Almatydaǵy jylý elektr ortalyǵyn gazǵa aýystyrý máselesin zertteımin - Baqytjan Saǵyntaev
ALMATY. QazAqparat - Almaty qalasynyń ákimi Baqytjan Saǵyntaev qaladaǵy úkimettik emes uıymdardyń jetekshilerimen kezdesti. Áleýmettik jaýapkershilik, ekonomıkalyq kúsh, quqyqtyq memleket jáne damyǵan azamattyq qoǵam qurý jolynda birlesip jumys isteý strategııasy ázirlenedi, dep habarlaıdy QazAqparat tilshisi.
«Almaty árdaıym azamattyq qoǵam salasyndaǵy úzdik tájirıbelerdi, ınnovatsııalyq jobalardy jáne keısterdi qoldaný alańy boldy. Búgin biz ÚEU tıimdiligin arttyrý jáne damytý úshin «jol kartasyn» ázirleýge jınaldyq. Men úshin qoǵamnyń ózekti máselelerin sheshýde sizderdiń pikir-usynystaryńyzdy tyńdaý mańyzdy. Biz qaladaǵy barlyq ÚEU-men birigip jumys isteýge daıynbyz. Sondyqtan basty basymdyqtar, strategııalar, problemalyq suraqtar men máselelerdi sheshý joldary meniń nazarymda bolady», - deıdi Almaty qalasynyń ákimi Baqytjan Saǵyntaev.
Kezdesý barysynda qala ákimi úkimettik emes uıymdar men qalalyq bılik organdary arasyndaǵy ózara is-qımyldyń birqatar perspektıvaly baǵyttaryn atady. Ekologııa máselesi men aýa sapasyna toqtaldy.
«Men almatylyqtardy ne mazalaıtynyn bilemin. Qalalyq JEO-2 gazǵa aýystyrý máselesin egjeı-tegjeıli zertteýdi josparlap otyrmyn. Sondaı-aq, ekologııa salasynda qorshaǵan ortany lastaýmen kúres jáne qalany kógaldandyrý óte mańyzdy», - dedi ákim.
Budan bólek, qoǵamdyq qaýipsizdikti nyǵaıtý, tártipsizdikter men qylmystardyń aldyn alý, jergilikti ózin-ózi basqarýdy damytý, PIK qyzmetiniń jumysyn jaqsartý, sondaı-aq qalalyq bıýdjet shyǵystarynyń ashyqtyǵy, kópbalaly otbasylarǵa áleýmettik kómek kórsetý, jastardy jumysqa ornalastyrý máseleleri talqylandy.
Búgingi kúni megapolıste 4 myńnan astam ÚEU jumys isteıdi, onyń 1 myńǵa jýyǵy belsendi. Qalada 45 jastar uıymy men 170 dinı birlestik bar.
Avtor: Alma Muqanova
