Almatydaǵy Juldyzdar alleıasy kıno ónerine eńbek sińirgen tulǵalardyń esimderimen tolyqty
ALMATY. QazAqparat - «Qazaqfılm» kınostýdııasynyń aýmaǵynda Qazaq kınosynyń kórnekti qaıratkerleriniń esimi berilgen Juldyzdar alleıasynda on úsh memorıaldyq eskertkishtiń saltanatty ashylý rásimi boldy, dep habarlaıdy QazAqparat.
Ony ulttyq kıno óneriniń metrleri – Asanáli Áshimov pen Oljas Súleımenov ashyp, Sháken Aımanovtyń eskertkishine gúl shoqtaryn qoıdy. Kınostýdııa prezıdenti Aqan Sataev bul
sharanyń Almaty kınohronıka stýdııasynyń 80 jyldyǵy men Halyqaralyq kıno kúnine oraılastyrylǵanyn atap ótti.
«Ókinishke oraı, qazaq kınosynyń negizin qalaýshylardyń birazy qazir janymyzda joq. Biz olardyń esimin qurmettep, bolashaq urpaqqa dáripteýimiz kerek» , - degen Qazaqstannyń Eńbek Eri, KSRO halyq artısi Asanáli Áshimov barsha kınogerlerdi birlikke shaqyrdy.
Juldyzdardyń ashylý saltanaty Qazaqstannyń ulttyq mádenıetine, ásirese, sińirgen eńbegi kıno óneriniń tarıhynda oıyp turyp oryn alatyn Oljas Súleımenovten bastaldy. Jazýshynyń shyǵarmashylyq ómirbaıanynda «Qazaqfılm» kınostýdııasynyń redaktsııa alqasynyń bas redaktory, 80- jyldardyń basynda Oljas Omarhanuly Qazaq KSR Memlekettik kınosynyń tóraǵasy qyzmetin atqardy. Qazaq kınosy klassıkteriniń altyn qoryna engen aty ańyzǵa aınalǵan Sháken Aımanovtyń «Atameken» fılmi Oljas Súleımenovtiń stsenarııi boıynsha túsirildi. Sondaı-aq Oljas Súleımenovtiń qoldaýynyń arqasynda búkil kıno álemine «Qazaqtyń jańa tolqynyn»
syılady.
Sondaı-aq, qazaqtyń tuńǵysh dybys rejısserleriniń biri Qadyr Qosaı men Qazaq KSR-niń eńbek sińirgen artısi, «Qyz Jibek» fılminde basty róldi somdaǵan aktrısa Merýert Ótekesheva da óz juldyzyn ashty. Aıta ketsek, estelik-juldyz 2017 jyly ómirden ozǵan akter, Qazaqstannyń halyq artısi Quman Tastanbekovke de berildi. Onyń juldyzyn Asanáli Áshimov ashty.
Sonymen qatar, bıyl jazda mezgilsiz ómirden ozǵan rejısser Satybaldy Narymbetovtiń esimi juldyzdar alleıasynda oryn tapty. Onyń shyǵarmalary tarıhtyń qatparlaryn ashty, ótken arqyly bolashaqqa qaraýǵa shaqyrdy. Satybaldy Narymbetov Táýelsizdik tańy atar shaqta alǵashqylardyń biri bolyp Frantsııanyń kıno óneri akademııasynyń laýreaty atandy, Jorj jáne Rıta Sadýl atyndaǵy bedeldi syılyqdy aldy. Juldyzdy ashqan «Qazaqfılm» kınostýdııasynyń prezıdenti Aqan Sataev Narymbetovtyń uldaryna jaqynda Frantsııada ótken Qazaqstan kınosynyń festıvali aıasynda rejısserge qaıtys bolǵannan keıin berilgen ulttyq kınematografııanyń damýyna qosqan úlesi úshin syılyqty tabys etti.
Juldyzdar alleıasynda, operator jáne rejısser, stsenarıst Igor Vovnıanko, akterler - Meńtaı Ótepbergenov, Jambyl Qudaıbergenov jáne Farhat Ábdiraıymov, operator jáne rejısser Vıacheslav Belıalov, bas ınjener-sáýletshi ıÝrıı Breýs, kınooperator jáne rejısser, Uly Otan soǵysynyń ardageri Mark Berkovıch, sondaı-aq sovettik Qazaqstannyń
alǵashqy hronıkasyn túsirgen Qazaqstannyń alǵashqy kınooperatorlarynyń biri Eskendir Tynyshpaev syndy eńbegi sińgen qaıratkerlerdiń esimi berildi.
Esterińizge sala ketsek atalǵan Juldyzdar alleıasy 2011 jyly Halyqaralyq «Eýrazııa» kınofestıvali sheńberinde ashylǵan bolatyn. Búgingi kúni bul alleıada barlyǵy 46 kınogerdiń esimi bar juldyzdar ornatylǵan.
