Almatydaǵy JOO-ǵa Álıhan Bókeıhannyń esimi berile me – Toǵjanov jaýaby

NUR-SULTAN. QazAqparat – Almatydaǵy Qazaq ulttyq agrarlyq ýnıversıtetine Álıhan Bókeıhannyń esimin berý zańnamada belgilengen tártippen qaralady. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.

«2020 jyly QR Aýyl sharýshylyǵy mınıstrligine qarasty Qazaq orman sharýashylyǵy jáne agromelıoratsııa ǵylymı-zertteý ınstıtýtyna Á.Bókeıhannyń esimi berildi. Sonymen qatar Almaty qalasyndaǵy Qazaq ulttyq agrarlyq ýnıversıtetine Á.Bókeıhannyń esimin berý máselesi zańnamada belgilingen tártippen qaralady», - dedi Eraly Toǵjanov.

Úkimet basshysy orynbasarynyń atap ótýinshe, Álıhan Bókeıhannyń esimi Qaraǵandy oblysynda erekshe ulyqtalyp keledi. 1998 jyly Aqtoǵaı aýdanynda «Úsh arys» (Á.Bókeıhan, J.Aqbaev, Á.Ermekov) eskertkishi ornatyldy. Qazirgi tańda eskertkish turǵan jer «Alash» alańy dep atalady. 2013 jyly Á.Bókeıhannyń týǵan jeri − Aqtoǵaı aýdanynda, Jekejal qystaýynyń orny topyraqtan arshylyp, irgetasy retke keltirildi. 2016 jyly Aqtoǵaıdaǵy Á.Bókeıhan atyndaǵy mektep aldynda oǵan arnalǵan bıýst qoıyldy. 2019 jyly Qarqaraly qalasynda Alash arystary Álıhan Bókeıhan, Ahmet Baıtursynuly jáne Álimhan Ermekovke arnalǵan eskertkish ornatyldy.

«Álıhan Bókeıhannyń 155 jyldyq mereıtoıy qarsańynda bıyl Qaraǵandy qalasyndaǵy Oktıabr aýdanyna ult qaıratkeriniń esimi berildi. Jalpy óńirde Á.Bókeıhannyń esimi 11 kóshe, 4 mektepke tirkelgen. Shymkent qalasynda, Aqmola, Aqtóbe, Atyraý, Jambyl, Qyzylorda, Pavlodar, Soltústik Qazaqstan, Túrkistan, Shyǵys Qazaqstan oblystarynda Á. Bókeıhannyń esimi kósheler men mektepterge berilgen, - dedi vıtse-premer.