Almatydaǵy jıi jer dúmpýleri saldarynan turǵyndar arasynda jyljymaıtyn múlikti saqtandyrý artqan
ALMATY. 18 mamyr. QazAqparat /Ádilet Musahaev/ - Búgin Almatyda jer silkinisi bola qalǵan kezde jyljymaıtyn múlikti saqtandyratyn «Seısmoqorǵanys» atty jańa baǵdarlama iske qosyldy.
Bul saqtandyrý ónimin «Nomad Inshýrans» kompanııasy iske qosyp, tusaýyn kesti.
Atalǵan baǵdarlama ázirge Almaty qalasy men oblysyndaǵy kópqabatty úıde turatyn páter ıelerine arnalǵan, degenmen bolashaqta búkil Qazaqstan boıynsha óristetý qarastyrylýda. Kompanııanyń basqarma tóraǵasy Rınat Ahmatıanovtyń aıtýynsha, bul kompanııada burynyraq zańdy jáne jeke tulǵalardyń múlikterin jer silkinisi qaýipsizdiginen saqtandyrý baǵdarlamasy qolǵa alynǵan, alaıda sońǵy kezdegi jıi jer dúmpýleri múlikterdi saqtandyrýǵa degen qyzyǵýshylyqty arttyrǵan. «Buryn biz osyndaı jaǵdaımen múlikterin saqtandyrǵysy keletin adamdardan kúnine 3-5 ótinish qabyldap kelsek, qazirgi tańda kópqabatty úıdiń 60-qa jýyq turǵyny qońyraý shalyp, páterlerin saqtandyrýdy ótinýde», - deıdi R.Ahmatıanov.
«Nomad Inshýrans» kompanııasynyń anderaıteri Nurtaı Seıdamınov atalǵan baǵdarlama boıynsha ishki qurylys jumystary áli bite qoımaǵan páterdi saqtandyrýǵa bolatyndyǵyn aıtady. Saqtandyrý tólemderi múliktiń tek túgeldeı kúıregen kezinde ǵana tólenbek. Kompanııa qabyldaǵan sheshim boıynsha Almatydaǵy jyljymaıtyn múliktiń bir sharshy metri ornalasqan aýdanyna qaraı 1000-1500 dollarǵa baǵalanýda. Tarıf saqtandyrý baǵasynan - 0, 1%. Máselen, osy baǵdarlama boıynsha Almatydaǵy bir bólmeli páterdi saqtandyrý 50 AQSh dollary aınalasynda bolmaq.
Sonymen birge saqtandyrýǵa qańqaly-qamystan jasalǵan ǵımarattar, aǵash úıler, saıajaı men sharýashylyq qurylymdary, 1965 jylǵa deıin salynǵan páterler jatpaıtyndyǵy aıtyldy.
