Almatydaǵy jergilikti atqarýshy organdardaǵy memlekettik tilde is júrgizýdiń úles salmaǵy 77 paıyzǵa jetti- Ahmetjan Esimov
Y. Qyrkúıektiń 23-i. QazAqparat /Erlik Erjanuly/ - Almaty qalasyndaǵy jergilikti atqarýshy organdarda memlekettik tilde is júrgizge jekelegen qurylym basshylary áli de laıyqty kóńil bólmeı keledi. Ony qala ákimi Ahmetjan Esimov keshe "Ana tilim - ardaǵym" dep atalatyn festıvalde aıtty, dep habarlaıdy QazAqparat.
"2005 jyly Almatydaǵy jergilikti atqarýshy organdardaǵy memlekettik tilde is júrgizýdiń úles salmaǵy 15 paıyzdy qurasa, 2007 jyly 56 paıyz, bıyl bul kórsetkish 77 paıyzǵa jetti. Alataý, Bostandyq, Medeý aýdandary óz qujattaryn 100 paıyz memlekettik tilde júrgizýde. Demek bul salada aıta qalarlyqtaı alǵa jyljý bar. Áıtse de jekelegen qurylym basshylary bul máselege áli de laıyqty kóńil bólmeı keledi. Mysaly qujat aınalymynyń kórsetkishteri: dene shynyqtyrý jáne sport basqarmasynda - 44 paıyz, qarjy basqarmasynda - 37 paıyz, energetıka jáne kommýnaldyq sharýashylyq basqarmasynda - 10 paıyzdy quraıdy. Memlekettik tildiń dendep ene almaı jatqandyǵy qarjy, tehnıka, energetıka salasy ekenin kórip otyrsyzdar", deıdi Ahmetjan Esimov. Shahar basshysynyń aıtýynsha, onyń termınologııa, qazaq tildi mamandar tapshylyǵyna baılanysty obektıvti sebepteri bar ekendigin de eskerý qajet. Áleýmettik zertteýlerge júginsek qala turǵyndarynyń 70 paıyzdan astamy qujattardy orys tilinde toltyrýǵa beıim. Bul búgingi qoǵamdyq ómirdegi shynaıy ahýal.
"Onymen sanaspaýǵa bolmaıdy. Áldekimder aıtyp júrgendeı til saıasatyn tizege salyp, kúshteýge kelmeıdi. Ony áleýmettik ómirdegi naqty jaǵdaıǵa qaraı baıyppen júrgizgen jón. Osyǵan oraı aýdan ákimderine, basqarma bastyqtaryna, basqa da memlekettik mekemelerdiń basshylaryna qujattardy memlekettik tilde júrgizýge barlyq jaǵdaıdy jasaýdy tapsyramyn. Qazir árbir sala boıynsha qazaq tilindegi is qaǵazdarynyń úlgileri daıyndalǵan. Endi osy úlgilerdi kúndelikti jumystarǵa keńinen engizý qajet", deıdi A. Esimov.
