Almatydaǵy JEO gazǵa kóshirilse, aýadaǵy zalaldy qaldyqtar 7,5 ese tómendeıdi

ALMATY. QazAqparat – Almaty ákimi Baqytjan Saǵyntaev Memleket basshysynyń joldaýyn júzege asyrýǵa arnalǵan qala aktıviniń otyrysynda strategııalyq mańyzdy ınfraqurylymdyq jobalardy iske asyrý týraly aıtty, dep habarlaıdy QazAqparat tilshisi.

Megapolıste 2020-2024 jyldarǵa arnalǵan «Jańa Almaty» keshendi damý josparyn iske asyrý jalǵasatyn bolady. Oǵan jyl saıyn shamamen 200 mlrd teńge bólinedi. Josparǵa qala shetindegi kólik, bıznes, áleýmettik ınfraqurylymdy jaqsartý boıynsha 286 joba kiredi.

Memleket basshysy óz Joldaýynda ekologııalyq máselelerdi sheshý qajettigin atap ótti. Baqytjan Saǵyntaevtyń aıtýynsha, sońǵy 11 jylda jyljymaly kózderden shyǵatyn zalaldy zattar aıtarlyqtaı tómendedi – 128 myńnan 70 myń tonnaǵa deıin jáne jeke sektordan 16 myńnan 1 myń tonnaǵa deıin.

Almatydaǵy ekologııalyq jaǵdaıdy jaqsartýdaǵy basty máseleniń biri-JEO-2 men JEO-3 gazǵa kóshirý. Sonyń arqasynda zalaldy qaldyqtar 7,5 esege – jylyna 50 myńnan 6,7 myń tonnaǵa deıin tómendeıdi.

Aýanyń lastanýyn boldyrmaý, eń aldymen kólikterden shyǵatyn zalaldy zattardy azaıtý úshin qalanyń kireberisterine 12 ekologııalyq post ornatyldy, onyń 9-y turaqty jumys isteıdi. Sondaı-aq, úsh mobıldi post pen jyljymaly ekologııalyq zerthana satyp alynady.

Qalany kógaldandyrý boıynsha aýqymdy jumystar júrgizilip jatyr. «Jasyl Almaty» baǵdarlamasy boıynsha qazirdiń ózinde 480 myńnan astam aǵash otyrǵyzyldy. Kúzde 350 myń aǵash otyrǵyzý josparda. Jalpy, 2022 jyldyń sońyna deıin 1 mıllıon aǵash otyrǵyzý kózdelgen.