Almatydaǵy JEO –2-ni jańǵyrtýda ekologııa basty másele bolmaq
ALMATY. QazAqparat – Baqytjan Saǵyntaev JEO-2-ni jańǵyrtý boıynsha «Samuryq-Energo» basshylarymen jáne qoǵam ókilderimen keńes ótkizdi, dep habarlaıdy QazAqparat tilshisi.
Almatylyqtar úshin eń ózekti máseleniń biri – ekologııanyń qazirgi jaǵdaıy. Óıtkeni, zalaldy zattardyń tórtten biri JEO-2-den bólinedi. Zalaldy zattardy azaıtý úshin jylý-elektr ortalyǵynyń qýatyn gazǵa kóshirý qajet.
Qazirgi kezde «QazEnergoónerkásiptik» ǴZI mamandary JEO boıynsha «Almatynyń energokeshenin gazdandyrý, qorshaǵan ortaǵa eń tómen zalal keltirý úshin JEO-2-ni jańǵyrtýdyń» jobasyn ázirleýde.
Joba boıynsha júrgizilgen alǵashqy nátıjeler 2020 jyldyń naýryz aıynda qaralady. Munda gazǵa kóshirý jáne gazben tazartý qondyrǵylaryn ornatýdan bastap jańa stansa salýǵa deıingi birneshe nusqalar saralanady. Basty maqsat — tútindi gazdaǵy zalaldy zattardyń quramyn ES standarttaryna deıin azaıtý.
«Búgingi kúni biz úshin modernızatsııalaý modelin belgileý mańyzdy, sodan soń sarapshylarmen jáne jurtshylyqpen birge barlyq taraptardyń kóńilinen shyǵatyn sheshimdi ashyq dıalog túrinde qabyldaıtyn bolamyz. Munda biz ekologııa múddesine júginemiz», — dep atap ótti Almaty ákimi Baqytjan Saǵyntaev.
