Almatydaǵy JEO-2-ni gazǵa kóshirý jobasy iske asyryla bastady
ASTANA. QazAqparat – Qazaqstannyń eń iri jylý elektr ortalyqtarynyń biri – Almaty JEO-2-ni gazǵa kóshirý jáne tolyq jańartý jónindegi jumystar praktıkalyq iske asyrý satysyna shyqty. Bul týraly QazAqparat «Samuryq-Energo» AQ baspasóz qyzmetine silteme jasap habarlaıdy.
Gaz stantsııasyn salýǵa qazan aıynda jarııalanǵan halyqaralyq tenderden keıin jobany qarjylandyrý kózderine qatysty máseleler sheshildi.
25 qarashada Almatyda stantsııa ıesi «Almaty elektr stantsııalary» AQ (AlES) men Eýropa Qaıta qurý jáne Damý banki (EQDB) arasynda «Qorshaǵan ortaǵa tıgizetin áserin barynsha azaıtý arqyly Almaty JEO-2-ni jańǵyrtý» jobasyn qarjylandyrý týraly kredıttik kelisim jasaldy. Atalǵan mámileniń somasy – 130 mlrd teńge.
Buǵan qosa, búgin AlES pen Qazaqstannyń Damý Banki (QDB) arasynda Jobany qarjylandyrýdy usyný jónindegi nıetter týraly kelisimge qol qoıyldy. Eski JEO-2 janyndaǵy alańda jańa gaz stantsııasyn salý boıynsha barlyq jumystardy sındıkat, jetekshi halyqaralyq jáne qazaqstandyq bankter – EQDB, Azııa Damý Banki (ADB) jáne Qazaqstan Damý Banki (QDB) qarajatyn tarta otyryp qarjylandyrý josparlanyp otyr. Qarjylandyrý ulttyq valıýta – teńgemen, TONIA-ǵa (Tenge OverNight Index Average) tirkelgen ózgermeli paıyzdyq mólsherlememen júzege asyrylady.
Jobaǵa «Samuryq-Qazyna» Ulttyq ál-aýqat qory korporatıvtik kepildigin beredi, bul sarapshylardyń baǵalaýy boıynsha táýekelderdi azaıtýǵa jáne qarjylandyrý sharttaryn jaqsartýǵa yqpal etedi, al kelisimniń ózi jobanyń uzaq merzimdi qarjylandyrýmen qamtylýyn qamtamasyz etedi.
«QR Úkimeti, «Samuryq-Qazyna» Qory jáne «Samuryq-Energo» AQ Almaty qalasy men Almaty aglomeratsııasynyń damýyna erekshe kóńil bólip keledi. Almaty JEO-2 nysanyn jańǵyrtý jobasynan basqa, ekologııalyq jaǵdaıdy jaqsartý jáne Almaty energııa torabyndaǵy jańartylatyn energııa kózderi obektilerin odan ári damytý úshin biz Almaty JEO-3 aýmaǵynda «Qýaty 545 MVt-tyq aralas tsıkldi gaz stantsııasyn salý» jobasyn iske asyryp jatyrmyz. Bul nysan 2025 jyly paıdalanýǵa berilmek jáne osy óńirdegi manevrlik qýat tapshylyǵyn aıtarlyqtaı tómendetýge múmkinidik beredi», - dedi «Samuryq-Energo» AQ Basqarma tóraǵasy Serik Tıýtebaev.
EQDB Vıtse-prezıdenti Alan Pııýdyń aıtýynsha, 2025 jylǵa qaraı klımattyq jáne jasyl qarjylandyrý EQDB-nyń jyl saıynǵy ınvestıtsııalarynyń jartysynan astamyn alady dep josparlap otyr.
«Búgingi shara Almatydaǵy aýa sapasyn, jergilikti halyqtyń ómir súrý sapasyn jaqsartatyn jáne Qazaqstannyń Parıj kelisimin saqtaýǵa jáne 2060 jylǵa qaraı kómirtegi beıtaraptyǵyna qol jetkizý maqsatyn jaqyndatatyn jasyl jobanyń keremet úlgisi», - dep atap ótti EQDB ókili.
Aıta ketsek, «Qorshaǵan ortaǵa tıgizetin áserin barynsha azaıtý arqyly Almaty JEO-2-ni jańǵyrtý» jobasy Almaty JEO-2 alańynda qýaty 600 MVt-ǵa deıingi gaz-týrbınalyq tehnologııalardy paıdalana otyryp, jańa stantsııa salýdy kózdeıdi. Tolyq paıdalanýǵa berý merzimi – 2026 jylǵy jeltoqsan. Jobanyń maqsaty – stantsııany tabıǵı gaz jaǵýǵa kóshirý esebinen stantsııanyń Almaty qalasynyń ekologııalyq jaǵdaıyna teris ekologııalyq áserin azaıtý, sondaı-aq qala men óńir tutynýshylaryn júkteme kestesine sáıkes jylý jáne elektr energııasymen senimdi ári úzdiksiz jabdyqtaýmen qamtamasyz etý.
Sarapshylardyń baǵalaýy boıynsha stantsııany gazǵa kóshirý jobasy Qazaqstan Respýblıkasy men Eýropalyq Odaqtyń eń qatań talaptaryna sáıkes keledi. Bul sáıkestikter JEO zııandy zattarynyń shyǵaryndylaryn 93%-ǵa azaıtýǵa múmkindik beredi, mólsherli bólshekter men kúkirt totyǵy shyǵaryndylarynyń quramynan kúl-qoj qaldyqtarynyń túzilýin boldyrmaıdy jáne kómýge jol bermeıdi, agregattardyń dybyssyz jumys isteýin qamtamasyz etedi. Munyń bári stantsııanyń qorshaǵan ortaǵa jáne Almaty aglomeratsııasynyń turǵyndaryna áser etý aımaǵyn azaıtýǵa tıis.
