Almatydaǵy JEO-2-ni gazǵa aýystyrý úshin 324 mlrd teńge jumsalmaq
ALMATY. QazAqparat - Almatynyń 2-shi jylý elektr ortalyǵyn tolyq gazǵa kóshirý 2026 jyly aıaqtalady. Bul týraly brıfıng barysynda QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.
Mınıstrdiń sózinshe, «Samuryq Qazyna» qory Qazaqstannyń biryńǵaı energetıkalyq júıesindegi jıilik pen qýatty retteý múmkindigimen Almatynyń 2-shi jylý elektr ortalyǵynda qýaty 600 MVt-qa deıingi bý-gaz qondyrǵysyn salý jobasyn iske asyrý jóninde usynys berdi.
«Almaty JEO-2-ni tolyq gazǵa kóshirý 2026 jyly aıaqtalady dep josparlanýda. Qor alǵashqy iske qosý keshenin (bý-gaz qondyrǵysy - 200 MVt) 2023 jyldyń sońyna qaraı paıdalanýǵa berýdi kózdep otyr», - deıdi Bolat Aqsholaqov.
Sonymen qatar, ol memlekettik saraptama nátıjeleri boıynsha jobanyń quny 324 mlrd teńge ekenin atap ótti.
«Sondaı-aq «Samuryq-Qazyna» bý-gaz qondyrǵylaryn sala otyryp, 1-shi jáne 3-shi jylý elektr ortalyqtaryn keńeıtýdi josparlap otyr. Almatynyń 1-shi jylý elektr ortalyǵyn aýystyrý jobasy jalpy qýaty 250 MVt-qa deıin bý-gaz qondyrǵylaryn ornatý arqyly stantsııany keńeıtýdi kózdeıdi. Qazirgi ýaqytta jobanyń tehnıkalyq-ekonomıkalyq negizdemesin ázirleý boıynsha jumystar júrgizilýde», - deıdi mınıstr.
Bolat Aqsholaqov Almaty JEO-3 jylý elektr ortalyǵyn rekonstrýktsııalaýdyń barlyq yqtımal tehnologııalyq nusqalaryn taldaý úshin «Almaty elektr stantsııalary» kompanııasy janynan jumys toby qurylǵanyn aıtty.
Búgingi tańda jobanyń tehnıkalyq-ekonomıkalyq negizdemesi ázirlený ústinde.
