Almatydaǵy JEO-2 gazǵa kóshse, ákimdik tarıftiń bir bóligin sýbsıdııalaıdy – Saǵyntaev
ALMATY. QazAqparat - Almaty ákimi Baqytjan Saǵyntaev JEO-2-niń gazǵa ótýi týraly aıtyp berdi, dep habarlaıdy QazAqparat tilshisi.
«Eń aldymen biz qaı joldy tańdaıtynymyzdy anyqtap alýymyz qajet. Ártúrli nusqalar bar, sarapshylar arzan nusqany tapty. Eger osy usynys maquldansa, qoǵamdyq tyńdaý ótedi, sodan keıin ınvestıtsııa tartý protsesi bastalady», - dedi Almaty ákimi Baqytjan Saǵyntaev baspasóz máslıhatynda.
Sonymen qatar, ol jobanyń qarjylandyrý máselesine toqtaldy.
«Eger bul mıllıardtaǵan dollar bolsa, onda qarjylandyrýdy qaıta qaraý kerek bolady. Bul qazirdiń ózinde qyzmet baǵasyna áser etedi. Eger biz kómirden gazǵa aýysatyn bolsaq, onda gazdyń baǵasy qandaı bolady jáne ony tarıf qalaı kóteredi osyǵan mán berýimiz qajet. Bul másele qala turǵyndarymen ashyq talqylanatyn bolady. Árıne, qorshaǵan ortany qorǵaý jáne densaýlyqqa qatysty ekologııalyq problemalardy eshqandaı aqshamen ólsheýge bolmaıdy. Eger halyqqa, ásirese halyqtyń áleýmettik álsiz toptaryna tóleý qıyn bolatyn bolsa, qala ákimidigi tarıftiń bir bóligin sýbsıdııalaýǵa kirisedi. Men, qala basshysy retinde, muny jaqsy túsinemin jáne soǵan daıynmyn», - dedi ákim.
