Almatydaǵy Jeltoqsan saıabaǵyn abattandyrý jumystarynan kemshilikter anyqtaldy
ALMATY. QazAqparat - Túrksib aýdanyndaǵy «Jeltoqsan» saıabaǵyn abattandyrý jáne kógaldandyrý jumystarynyń aralyq nátıjelerimen tanysqan qala ákimi Erbolat Dosaev birqatar kemshilikterdi baıqap, merdigerge olardy óz qarjysy esebinen joıýdy tapsyrdy, dep habarlaıdy QazAqparat qala ákiminiń baspasóz qyzmetine silteme jasap.
Joba boıynsha saıabaqty abattandyrý men kógaldandyrý, sonyń ishinde kóldi tazartý jáne uzyndyǵy 40 metr kópir salý qarastyrylǵan. Búginde merdiger kompanııa jumystardyń bir bóligin oryndady - saıabaq aýmaǵynda jaıaý júrginshi joldary salyndy, oryndyqtar qoıyldy, jaryq shamdary ornatyldy jáne 3 myńnan astam aǵash otyrǵyzyldy.
Tekserý barysynda qala ákimi trotýar plıtkalaryn tóseý sapasyn synǵa aldy. Barlyq jaıaý júrginshiler jolynda tóselgen tastar edáýir otyryp qalǵan, aralary ajyrap, jaryqtar baıqalady. Qala basshysy aǵash oryndyq keshenderiniń betin óńdeý tehnologııasyna qatysty eskertý jasady. Olardyń boıaýy búkil nysandy paıdalanýǵa bergenge deıin eskirip, túsip qalýy ábden múmkin. Saıabaq aýmaǵyn jaryqpen tolyq qamtamasyz etý úshin Erbolat Dosaev jaıaý júrginshiler jolynyń eki jaǵyna da jaryq shamdaryn ornatýdy tapsyrdy. Sondaı-aq, kógaldandyrý kezinde durys aǵash kóshetterin nemese qajet bolǵan jaǵdaıda kógaldardy tańdaý úshin topyraqtyń erekshelikterin eskerý qajettigin atap ótti.
Ákim nysannyń barynsha jaıly bolýy kerektigin eskertti. Bul saıabaq jaqyn mańdaǵy «Jas qanat», «Maıak toǵaıy», «Kolhozshy» jáne basqa da shaǵyn aýdandardyń 20 myńnan astam turǵyny úshin jańa demalys ortalyǵy bolmaq. Bul rette ákimdik tıisti aqsha qarajatyn bóledi, olar nysanaly maqsat boıynsha paıdalanylýy tıis. Merdigerge abattandyrý men kógaldandyrý jumystaryn barlyq talaptardy jáne tehnologııalyq protsesterdi saqtaı otyryp oryndaý tapsyryldy.
Sondaı-aq, ákimge saıabaqty damytý boıynsha aldaǵy josparlar tanystyryldy. Rekonstrýktsııalaý barysynda jaıaý júrginshiler kópiri, balalar jáne sport alańdary salynyp, shaǵyn sáýlet pishinderi ornatylady. Mamandar sýy az kóldi tazartýǵa nıetti. Sońǵy jyldary toǵan qamysqa tolyp, túbi taıazdanyp qalǵan, al jaǵalaýyna qurylys qoqystary tógilgen. Kóldi tazartý jobasy aıasynda ony qalalyq aryq júıesine qosý josparlanyp, Jarbulaq ózeninen sýyn molaıtý múmkindigi qarastyrylyp otyr.
Obektini paıdalanýǵa berý merzimi merdiger uıym tarapynan bolǵan kidiristerge baılanysty birneshe ret keıinge shegerildi. Kompanııa barlyq jumystardy aǵymdaǵy jyldyń qyrkúıegine deıin aıaqtaýy tıis. Erbolat Dosaev abattandyrý jáne kógaldandyrý jobasy aıaqtalǵannan keıin saıabaqty jeke qabyldap alatynyn atap ótti.
Eske sala keteıik, kún keshe Almatyda Dinmuhamed Qonaevtyń murajaı-úıi ashyldy.
