Almatydaǵy jekemenshik emhanalardyń birinde em alǵan er adam qaıtys boldy
Qaıǵyly oqıǵa týraly aqparat áleýmettik jelide tarady.
Jazba avtorynyń aıtýynsha, er adamnyń eki tisin julyp, ımplant ornatý kerek bolǵan. Alaıda marqumnyń balasynyń aıtýynsha, otadan keıin ákesinde anafılaktıkalyq shok bolǵan.
«Emhana qyzmetkerleriniń biliktiligi tómen, anafılaktıkalyq shok kezinde alǵashqy medıtsınalyq kómek kórsetpegen. Olar adamdy qutqarýǵa bolatyn qundy ýaqytty jiberip aldy. Dárigerler oǵan shaı ishýdi usynǵan. Aýrýhanaǵa jetkizý kezinde jedel járdemde eshkim erip júrmegen, tamyr soǵysy toqtap qalǵan. Ol 55 jasta, deni saý, kóńildi adam edi.
Hırýrgpen, bas dárigermen sóılesken kezde olar hattamalardy oryndamaıtyny belgili boldy: olar ota jasaýǵa kelisim alyp, naýqastarǵa taldaý jasamaıdy, operatsııa aldynda kardıogramma jasap, anestetıkterge test almaıdy. Barlyq kelisim tek sóz júzinde. Emhana qyzmetkerleri qabiletsiz, olardyń salǵyrttyǵynan ákem qaıtys boldy», - delingen jazbada.
Er adam Ortalyq qalalyq klınıkalyq aýrýhanaǵa jetkizilgen.
Medıtsına mekemesi baspasóz qyzmetiniń málimetinshe, aýrýhanaǵa túsken kezde naýqas klınıkalyq ólim jaǵdaıynda bolǵan.
«Naýqas ortalyq qalalyq klınıkalyq aýrýhananyń jedel járdem bólimine klınıkalyq ólim jaǵdaıynda anafılaktıkalyq shok dıagnozymen tústi. Pýls joq, júrek soǵysy estilmedi. 30 mınýt reanımatsııa júrgizildi, biraq, ókinishke qaraı, aman alyp qala almadyq. Júrek jumysyn qalpyna keltirý múmkin bolmady», - dep habarlady Ortalyq qalalyq klınıkalyq aýrýhananyń baspasóz qyzmeti.