Almatydaǵy jartylaı marafonǵa 28 eldiń ókili qatysty
NUR-SULTAN, QazAqparat – Ótken demalys kúnderi besinshi Almaty jartylaı marafony ótti. Jarysqa barlyǵy 5 500 áýesqoı sportshy qatysty. Olardyń arasynda 200-ge jýyq sportshy álemniń 28 elinen kelip qatysty, dep habarlaıdy QazAqparat.
Sheteldik qatysýshylardyń kópshiligi TMD elderinen, alaıda Ulybrıtanııa, AQSh, Avstralııa sııaqty memleketterden kelgender de bar.
Aıta keterligi, qorytyndy boıynsha absolıýtti esepte Máskeýden kelgen jartylaı marafonshy jeńil atletıkadan halyqaralyq dárejedegi sport sheberi Rınas Ahmadeev jeńimpaz atandy. Onyń máre ýaqyty - 1 saǵat 5 mınýt 11 sekýnd, bul Almaty jartylaı marafony trassasynyń 21.1 km-degi jańa absolıýtti rekord.
«Elimizde ótetin marafondar álem saıystarynyń kartasyna túsip, halyqaralyq is-sharalar deńgeıine shyqqanyna óte qýanyshtymyn. Bul jaǵdaı ishki týrızmge serpin berip qana qoımaı, syrttan keletin týrıster úshin de tartymdy oqıǵaǵa bolmaq», - dedi jarysty uıymdastyrýshy Saltanat Qazybaeva.
«Mundaı is-sharalar qazaqstandyq jáne sheteldik týrısterdiń nazaryn aýdarady. Sondyqtan sońǵy birneshe jyldary osyndaı is-sharalardyń uıymdastyrýshylaryn barynsha qoldaýǵa tyrysyp júrmiz. Mysaly, Business Media Central Asia kórme holdıngimen, «Birinshi bolý – batyldyq» qorymen birlesip, osy jyldyń maýsym aıynda elordada «Qazaqstan Live Fest» is-sharasyn ótkizýdi josparlap otyr», - dedi Kazakh Tourism ulttyq kompanııasynyń Basqarma tóraǵasy Talǵat Amanbaev.
Kazakh Tourism baspasóz qyzmetiniń habarlaýynsha, Qazaqstan Live Fest-týrızm, sport jáne belsendi ómir saltyna arnalǵan jańa shara. Festıval aıasynda 2022 jyldyń 19 maýsymynda alǵashqy astanalyq Nur-Sultan Half Marathon jartylaı marafony bastaý alady. Marafonnyń máresi men sóresi «EXPO» halyqaralyq kórme ortalyǵynyń aýmaǵynda ótedi.
