Almatydaǵy jartylaı marafonda 4 myń adam júgirdi
ALMATY. QazAqparat - Búgin sportpen aınalysatyn tórt myń adam birinshi «Almaty jartylaı marafonyn» júgirip ótti. Oǵan Qazaqstan, AQSh, Frantsııa, Japonııa, Reseı, Qyrǵyz Respýblıkasy men ózge elderdiń sportshylary qatysty, dep habarlaıdy QazAqparat jarysty uıymdastyrýshylarǵa silteme jasap.
Márege birinshi bolyp 10 km qashyqtyqqa júgirgender keldi. Erler arasynda Dmıtrıı Ivanchýkov (Merke q.), qyzdar arasynda Mádına Kerimova, (Taldyqorǵan q.) birinshi oryndy ıelendi.
Eń júırik jartylaı marafonshy 21 km qashyqtyqtyqty baǵyndyrǵan Ilıa Tıapkın (Bıshkek q.) boldy. Al áıelder qatarynan erler arasyndaǵy absolıýtti chempıonnan nebári 8 mınýtqa artta qalǵan Sıtora Hamıdova (Termez q.) jeńipaz atandy.
«Almaty jartylaı marafony» alǵash ret ótti. Endi, ol jyl saıyn kúzde uıymdastyrylady. Jarty jyldan keıin 21 sáýirde ondaǵan myń júgirýshi kútetin shara - «Almaty marafonynda» qarsy alamyz. Jarystarymyzdyń bári Ortalyq Azııadaǵy eń basty marafonǵa daıyndyq aıasynda ótedi», - dedi «Birinshi bolý - batyldyq» korporatıvtik qorynyń dırektory Saltanat Qazybaeva.
Jarys sóresine jasty 60-tan asqan 41 qatysýshy shyqsa, olardyń 16-sy jartylaı marafon qashyqtyǵyn eńserdi.
«Tek Almaty nemese Qazaqstanda emes, sonymen birge shetelde ótetin jarystarǵa úzbeı qatysýǵa tyrysamyn. Eshqashan munymen kásibı túrde aınalysqan joqpyn, degenmen, osy ýaqytqa deıin 150 myń shaqyrym júgirdim, - deıdi jartylaı marafonǵa qatysýshy 71 jastaǵy Marat Baltabaev.
Aıta keterligi ol jaqynda ardagerlerdiń I Azııa-Tynyq muhıty oıyndarynda 3 altyn alqa aldy.
«Almaty jartylaı marafonynyń» ár qatysýshysy alqa aldy. 21 km qashyqtyqqa júgirýden absolıýtti chempıondar 1,5 mıllıon teńge kóleminde júlde qoryn ózara bólisti.
Eske sala ketsek, buǵan deıin atalmysh jartylaı marafonda júgirgen 18 jastaǵy jigit qaıtys bolǵanyn habarlaǵanbyz.
