Almatydaǵy jármeńkede jalpy somasy 135,6 mln. teńgeniń 244 tonna ónimi usynyldy
ALMATY. QazAqparat - Búgin Almaty qalasyndaǵy Astana alańynda Ońtústik Qazaqstan oblysy aýyl sharýashylyǵy taýarlaryn óndirýshileriniń jármeńkesi ótti.
Ońtústik Qazaqstan oblysynyń 3 qalasy men 11 aýdanynyń taýar óndirýshileri Almatyǵa jalpy somasy 135,6 mln. teńgeniń 244 tonna ónimin alyp keldi.
Olardyń ishinde et jáne balyq ónimderi - 72 tonna, jemis-kókónis ónimderi - 135 tonna, sút ónimderi - 12 tonna jáne basqa da ónimder - 25 tonna.
Qala turǵyndary men qonaqtaryna baǵasy naryq baǵasynan 15-20 paıyzǵa tómen, ekologııalyq jaǵynan taza ónimderdiń 50-den astam túri usynyldy.
Almaty qalasynyń ákimi Baýyrjan Baıbek pen Ońtústik Qazaqstan oblysynyń ákimi Beıbit Atamqulov jármeńkeni aralap, taýarlardyń sapasy men baǵa deńgeıin kórdi.
B. Baıbek óńirlik jármeńkelerdi uıymdastyrýdyń mańyzdylyǵyn aıtyp, qazirgi tańda Almatynyń aınalasynda azyq-túlik beldeýin qalyptastyrý boıynsha jumystar atqarylyp jatqandyǵyn jetkizdi.
Bıyl Almatyda osyndaı keńeıtilgen taǵy 10 aýyl sharýashylyǵy jármeńkesin ótkizý josparlanǵan.
Eger ótken jyly Ońtústik Astanada demalys kúnderi 700 jármeńke ótkizilgen bolsa, bıyl barlyq aýdandardy qosqanda 800 jármeńke uıymdastyrý kózdelip otyr.
Aıta ketelik, Almatyda aýyl sharýashylyǵy jármeńkeleri azyq-túlik naryǵyndaǵy baǵany turaqtandyrý maqsatynda sońǵy 8 jyldan beri úzbeı ótkizilip keledi.
