Almatydaǵy jappaı tártipsizdik kezinde anasy men qyzy 4 polıtseıge kómektesti
Anasy Svetlana men qyzy Polına Prosvırınanyń aıtýynsha, olar 5 qańtar kúni ortalyqta bolyp jatqan tártipsizdikten beıhabar bolǵan.
«Biz kólikpen ál-Farabı jaqtan Nazarbaev kóshesimen tómen túsip kele jattyq. Rólde qyzym boldy. Aldymyzdan birneshe polıtsııa kóligi shyǵyp, joldy jaýyp, tez keri burylýdy buıyrdy. Nazarbaev kóshesimen joǵary qaraı áskerıler men polıtseıler júgirip bara jatty. Kólikti bura salysymen, esikti ashyp tórt polıtsııa qyzmetkerin otyrǵyzdyq. Olardyń qolynda qalqandary boldy. Bireýi aıaǵynan qatty jaralanǵan eken. Biz eshteńe túsine almadyq. Polıtsııa qyzmetkerlerin dittegen jerlerine jetkizip saldyq. Olarmen tanysyp ta úlgermedik», – deıdi, Svetlana Prosvırına.
Keıin belgili bolǵanyndaı, almatylyqtar kómektesken polıtsııa qyzmetkerleri - Jetisý aýdandyq polıtsııa basqarmasynyń ýchaskelik ınspektorlary eken.
Jas tártip saqshylary búgin Svetlana jáne Polınamen kezdesip, polıtsııa departamenti basshylyǵymen birge olarǵa alǵystaryn bildirdi.
«Bul is-áreket – adamgershiliktiń, jaýapkershilik pen belsendi azamattyqtyń jarqyn úlgisi. Svetlana men onyń qyzy qaýip-qaterge qaramastan, erlik kórsetip, polıtsııa qyzmetkerlerine kómektesti. Olarǵa ІІM basshylyǵynyń, jeke quramnyń jáne jeke ózimniń atymnan shyn júrekten alǵys aıtamyn», - dedi Almaty qalalyq polıtsııa departamentiniń basshysy Qanat Taımerdenov.
