Almatydaǵy Jandosov kóshesi 6 jolaq bolyp keńeıedi

ALMATY. QazAqparat – Almaty bıligi qala kóshelerinde qandaı ózgerister jasaıtynyn málimdedi. Bul týraly búgin Almaty ákimdiginde ótken baspasóz brıfıng barysynda aıtyldy, dep habarlaıdy QazAqparat tilshisi.

Atap aıtqanda, Jandosov kóshesi keńeıip, BRT ekinshi kezegine jobalyq-smetalyq qujattama ázirlenedi. Saın kóshesi uńǵylanyp sozylatyn boldy.

«BRT birinshi kezeńinde Jandosov kóshesiniń Súleımenov pen Úlken Almaty ózenine deıingi bóligi qalyp qoıǵan bolatyn. Shamamen 1 shaqyrym jol edi. Bul ýchaskede jospar boıynsha joldyń enin keńeıtý kózdelgen. Atalǵan bólikte jol qozǵalysy 6 jolaqta júrgiziledi. Naqtyraq aıtqanda, kósheniń oń jaǵy keńeıtiledi. Sol jerdegi úılerdiń 90%-y satyp alyndy. Bolashaqta olar súriledi», - dedi qalalyq Mobıldilik basqarmasy basshysynyń orynbasary Ernur Ábjahan.

Onyń aıtýynsha, BRT jelisiniń ekinshi kezeńi Tımırıazev-Jeltoqsan kósheleriniń qıylysynan Qulja tas jolyndaǵy Jetisý bazaryna deıin 13 shaqyrymǵa sozylady.

«Saın kóshesi Rysqulov pen Móńke bı kósheleriniń aralyǵyna deıin 3,2 km sozylatyn boldy. Osy maqsatta jekemenshik ıelerinen jer ýchaskelerin satyp alý kózdelgen. Qazir baǵalaý jumystary júrip jatyr. Bul jumystar 2020 jylǵa deıin aıaqtalýy tıis bolatyn. Alaıda barlyǵy qarjylandyrýǵa, jer ýchaskelerin satyp alý uzaqtyǵyna baılanysty», - dedi Ernur Ábjahan.