Almatydaǵy jańa emhanada naýqastardy ratsııasy bar menedjerler qarsy alady
ALMATY. QazAqparat - Almatyda №5 qalalyq klınıkalyq aýrýhana bazasynda jańa emhana ashyldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Almaty ákimi Baýyrjan Baıbek №5 qalalyq klınıkalyq aýrýhana bazasynda ashylǵan jańa emhanany kórdi. Medeý aýdanynda ashylǵan bul emhana kúnine 600-ge deıin kelýshini qabyldap, 20 myńǵa deıin saraptama jasaıdy.
Aýrýhananyń bas dárigeri Bolat Sadyqov kezekte turýdy azaıtý jáne kelýshilerdiń jaılylyǵy úshin tirkeý bólimin (regıstratýra - red) alyp tastaǵandaryn aıtty.
«Arnaıy oqýdan ótken, qoldarynda ratsııalary bar menedjerler kelýshilerdi ertip júredi jáne túrli keńester beredi. Búgingi kúni bizdiń mamandar zamanaýı eýropalyq jabdyqtarmen jumys jasaýda. Mysaly, otolarıngologtyń kabınetine solardyń úzdikteriniń biri qoıyldy. Jalpy, nysan qurylysynyń jáne ondaǵy qondyrǵylardyń quny 1,5 mlrd. teńgeni qurady», - dedi B.Sadyqov.
Tórt qabatty jańa ǵımaratta otbasylyq, balalar densaýlyǵy, sýrdologııalyq, reabılıtatsııalyq ortalyqtar, fızıodıagnostıkalyq bólim, kúnine 20 myńǵa jýyq adamnyń saraptamasyn jasaıtyn ári 5 emdeý mekemesi bekitilgen klınıkalyq-dıagnostıkalyq ortalyqtandyrylǵan zerthana ornalasqan.
«Bizge qajet jabdyqtardyń bári satyp alyndy. Olardyń arasynda avtoreflektometr bar, onyń ereksheligi eki aılyq balanyń da kóz aýrýyn birden anyqtaı alady. Tipti, kózdiń qan qysymyn anyqtaıtyn apparat ta bar. Endi burynǵy eski ádis boıynsha jumys istemeımiz. Barlyq jumysty avtomatty rejimdegi qondyrǵylar atqaratyn bolady»,- dedi oftalmolog-dáriger Eldos Túsipbaev.
