Almatydaǵy jalpyqalalyq senbilikte 15 myń tekshe metr qoqys jınalyp, 5 myń kóshet otyrǵyzyldy
ALMATY. QazAqparat - Almatyda 22 sáýir kúni qala ákimdiginiń qoldaýymen qoǵamdyq uıymdar uıymdastyrǵan Almaty Clean & Green keń aýqymdy ekologııalyq aktsııasy ótti, dep habarlaıdy QazAqparat tilshisi.
Qala ákimi Erbolat Dosaev eki jerdegi – Baým toǵaıy men Medeý aýdanyndaǵy ekoaktsııaǵa qatysty.
Shahar basshysynyń aıtýynsha, qorshaǵan ortany qorǵaý, tabıǵatty aıalaýǵa baǵyttalǵan mundaı aktsııalar megapolıste jaqsy dástúrge aınalýǵa tıis.
Jalpyqalalyq senbilikke 82 myńnan astam adam qatysyp, 5 myń aǵash otyrǵyzylyp, 15 myń m3 astam qoqys jınaldy.
Ekologııalyq aktsııany ambassadorlar, tanymal ártister biraýyzdan qoldady.
«Keremet, tamasha aktsııa. Álemde ekologııa máselesi qanshalyqty ózekti ekenin bárimiz bilemiz, bul súıikti qalamyz – Almatyǵa da qatysty. Bul óte mańyzdy oqıǵa, biz Almaty Clean & Green aktsııasyn tal egýden bastaǵanymyzǵa qýanyshtymyz. Jas shybyqtyń jaıqalǵan aǵashqa aınalaryna senimimiz mol», - deıdi «Djýlııa» mıýzıkliniń ujymymen birge aktsııaǵa qatysqan belgili mýzykant, A'Studio tobynyń prodıýseri Baıǵalı Serkebaev.
Senbilikke qatysqan aqyn Muratqan Shoqan almatylyqtardy jasyl jelekti kútip ustaýǵa shaqyrdy.
«Senbilikke búgin turǵyndar, eriktiler, ártister qatysyp jatyr. Biz jasyl jelekti aıalap ustaýymyz kerek. Menińshe, budan bizdiń qalamyz kórkeıedi. Senbi kúni ǵana emes, kúndelikti ómirde de osyny ustanýymyz kerek», - dedi aqyn Muratqan Shoqan.
Aıta keteıik, jalpyqalalyq senbilikti ótkizýge «Posadiderevo.kz» RQB, ECONETWORK, Qazaqstannyń kógaldandyrýshylar qaýymdastyǵy, «Sporttyq týrıster dostastyǵy» QU, «Greenup.kz» QQ muryndyq bolǵan. Qoǵamdyq uıymdar áleýmettik jelilerde aktsııany zamanaýı formatta ótkizýge shaqyrdy.
Almaty ákimdigi qajetti qural-jabdyqpen (qolǵap, tyrma, kúrek, qap), kóshetpen qamtamasyz etip, aktsııaǵa qatysýshylarǵa as-sý berdi. Senbilikke kelgenderge merekelik kóńil kúı syılaý úshin barlyq aýmaqta jattyǵý, ıoga, zýmba, sheberlik dáristeri, fleshmob uıymdastyrlyp, baıqaý ótkizdi.
Ekobelsendiler Túrksib, Jetisý jáne Medeý aýdanynynda negizgi tórt oryndy belgiledi. Qoǵam belsendileriniń bastamasyna aýdandyń ákimdikter de atsalysyp, ózderiniń aýmaǵynda kommýnaldyq qyzmetpen birlesip, jergilikti jerde senbilik ótkizdi. Aktsııa barysynda qalanyń barlyq aýdanynda 26 aýmaq tazartyldy.
