Almatydaǵy Yqylas mýzeıine Qurmanǵazy dombyrasynyń kóshirmesi tabystaldy
ALMATY. QazAqparat - Dáýlesker kúıshi Qurmanǵazynyń dombyrasynyń kóshirmesi men onyń shákirti Erǵalı Esjanovtyń dombyrasynyń túpnusqasy Almatydaǵy Yqylas atyndaǵy halyq mýzykalyq aspaptary mýzeıine tabys etildi, dep habarlaıdy QazAqparat tilshisi.
Kúıshiniń qoly tıgen eki ǵasyrǵa jýyq tarıhy bar asa qundy jádiger Astrahan oblysyndaǵy Qurmanǵazy atyndaǵy mádenı ortalyqta saqtaýly tur. Búgin Yqylas atyndaǵy halyq mýzykalyq aspaptar mýzeıine sol dombyranyń kóshirmesi syıǵa tartyldy.
Odan bólek Qurmanǵazy babamyzdyń 200 jyldyǵy aıasynda ótkiziletin shara barysynda úsh kúndik kóshpeli kórme uıymdastyryldy. Kórmege Atyraý jáne BQO óńirlik ólketaný mýzeılerinen Dına Nurpeıisovanyń kamzoly men beldigi, Qurmanǵazynyń dara aýyz myltyǵy, HІH ǵasyrdaǵy zergerlik buıymdar qoıyldy.
Saltanatty sharaǵa qatysqan Baýyrjan Baıbek qundy jádigerlerdi óz qolymen qabyldap aldy.
Aıtýly shara Qurmanǵazynyń 200 jyldyǵyna oraı ıÝNESKO sheńberinde ótkizildi.
"Qazaq mádenıetine ólsheýsiz mura qaldyrǵan Qurmanǵazy Saǵyrbaıulynyń 200 jyldyǵyna oraı QR MSM men Almaty ákimdigi mańyzdy shara uıymdastyryp otyr. Qurmanǵazy babamyz ózi jatqan Astrahan oblysynan, BQO, Atyraý oblysynan delegatsııa kelip jatyr. Qurmanǵazy atyndaǵy akademııalyq halyq aspaptary orkestri men Yqylas atyndaǵy halyq aspaptary mýzeıiniń arasynda ózara túsinistik týraly memorandýmǵa qol qoıyldy", - dedi orkestrdiń dırektory Nurǵısa Dáýeshev.
Mádenı shara kúı keshine jalǵasty.
Qurmanǵazy atyndaǵy akademııalyq halyq aspaptary orkestriniń dombyrashylar quramy Qurmanǵazynyń birneshe kúıin oryndady.
«Qurmanǵazy - tek bizdiń ǵana rýhanı muramyz emes, búkil álemge tanylǵan tulǵa. Qurmanǵazy babamyzdyń 200 jyldyǵy ıÝNESKO sheńberinde atalyp ótýde. Osyǵan oraı Astrahandaǵy Qurmanǵazy atyndaǵy mádenı ortalyq pen Oral, Atyraý óńirlerinen tarıhı ólketaný mýzeıleriniń ujymyn shaqyryp otyrmyz. Bizdiń maqsatymyz osyndaı mádenı sharalar arqyly Qurmanǵazynyń 200 jyldyq mereıtoıynyń mazmunyn asha túsý. Bizdiń basty mindetimiz Qurmanǵazy shyǵarmashylyǵyn, dombyrasyn, shákirtteriniń murasyn, halyqqa qaldyrǵan kúı murasyn jıyntyqtaı otyra nasıhattaý, dáripteý, jańǵyrtý urpaq sanasynda saqtaýǵa barynsha úlesimizdi qosý bolyp tabylady», - dedi Yqylas atyndaǵy halyq mýzykalyq aspaptar mýzeıiniń dırektory, fılologııa ǵylymdarynyń kandıdaty Uljan Baıbosynova.
