Almatydaǵy XII Halyqaralyq Jáýtikov olımpıadasyna 416 oqýshy qatysady
ALMATY. QazAqparat - Almatyda ústimizdegi jyldyń 14-18 qańtary aralyǵynda Orynbek Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynda matematıka, fızıka jáne ınformatıka pánderinen XII Halyqaralyq Jáýtikov olımpıadasy ótedi.
Onyń saltanatty ashylý rásimi 14 qańtar kúni M. Áýezov atyndaǵy Qazaq memlekettik akademııalyq drama teatrynda saǵat 16:00-de bastalady. Olımpıadanyń jabylý rásimi de 18 qańtar kúni saǵat 16:00-de osy teatrda ótedi.
Jáýtikov olımpıadasyna álemniń 18 memleketinen, Armenııa, Grýzııa, Indonezııa, Mońǵolııa, Reseı, Ázerbaıjan, Bolgarııa, Kosovo, Qyrǵyzstan, Rýmynııa, Tájikstan, Túrkimenstan, Ózbekstan, Armenııa, Belarýs, Serbııa, Ýkraına jáne tuńǵysh ret Túrkııa men Chehııa elderinen quramynda 278 oqýshy bar 44 komanda qatysady dep kútilýde. Sondaı-aq, Qazaqstannyń barlyq óńirlerinen, Almaty men Astana qalalarynan, O. Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternaty men Nazarbaev zııatkerlik mektepterinen 138 oqýshy qatysady. Barlyǵy 416 oqýshy baqtaryn synaıtyn bolady.
Halyqaralyq qazylar alqasynyń quramynda Qazaqstan, Reseı, Bolgarııa, Ázerbaıjan, Armenııa, Grýzııa, Belarýs, Ýkraına jáne Ózbekstan sekildi elderdiń ǵalymdary bolady. Qazylar alqasynyń tóraǵasy - Ál-Farabı atyndaǵy Qazaq ulttyq ýnıversıtetiniń rektory, tehnıka ǵylymdarynyń doktory Ǵalymqaıyr Mutanov.
Almaty qalasy atynan Halyqaralyq Jáýtikov olımpıadasy týraly erejege sáıkes úsh komanda qatysady. Qalalyq irikteý týrlarynyń qorytyndysy boıynsha bul qurama komandalar fızıka-matematıkalyq baǵyttaǵy № 39, 90, 134, 165, 173, 178-shi mektepterinen jáne Qazaq-Túrik lıtseıi jeńimpazdarynan quralady.
Olımpıadany uıymdastyrýshy - O. Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternaty men Respýblıkalyq «Daryn» ǵylymı-praktıkalyq ortalyǵy.
