Almatydaǵy velosherýdiń jańa maýsymyna eki myń adam qatysty
ALMATY. QazAqparat - Almatyda «Sporttyq Almaty» baǵdarlamasy aıasynda jyl saıyn ótetin velosherýdiń jańa maýsymy bastaldy, dep habarlaıdy QazAqparat tilshisi.
Bıylǵy maýsymnyń alǵashqy velosherýine 2 myńnan astam adam qatysty. Sonymen qatar, velosherý bastalmas buryn, qatysýshylarǵa arnaıy nómirler berilip, sol arqyly márede baǵaly syılyqtar berildi. Qatysýshylar saǵat 08:30-da jınaldy. Velosherý 09:00-de «Nurly-Taý» bıznes ortalyǵy mańynan bastalyp, Tuńǵysh Prezıdent saıabaǵy tóńireginde aıaqtaldy. Jalpy, velosıpedshiler batys baǵytta 9 shaqyrym joldy júrip ótti.
Áýeskoılardy márede 1980 jyldyń Olımpıada chempıony Jaqsylyq Úshkempirov jańa velomaýsymnyń ashylýymen quttyqtady.
«Velosherýdiń qatysýshylaryna jáne de Almaty qalasynyń ákimdigine, osyndaı merekelik sharany uıymdastyrǵany úshin sheksiz alǵysymdy bildiremin. Sportpen shuǵyldanyp, salaýatty ómir saltyn qalyptastyrýlaryńyzǵa tilektespin», - dedi Jaqsylyq Úshkempirov.
Sonymen qatar, búgingi sporttyq sharada bas qosqandar alyp shahardyń namysyn qurlyqaralyq velododalarda qorǵaıtyn «Apple Team» jańa kásipqoı velokomandasyn tanystyrý rásimin tamashalap, veloshabandozdarmen tanysty.
Aıta ketetin jaıt, márede áýesqoılar baǵaly syılyqtar oınatylatyn lotoreıaǵa qatysty. Basty syılyq - elektrmen júretin velosıpedti Sergeı Jılkov esimdi almatylyq jeńip aldy.
«Men osyndaı baǵaly syılyqty jeńip alǵanyma baqyttymyn. Bul kútpegen tosyn syı boldy. Barlyq uıymdastyrýshylarǵa shyn júrekten alǵysymdy bildiremin. Bolashaqta, qalalyq velosherýlerge jıi qatysamyn. Búgin birinshi ret qatysyp otyrmyn, maǵan óte unady», - dedi Sergeı.
Aıta ketsek, velosherý maýsymynyń ashylýynda qala turǵyndarymen qatar, qazaqstannyń áıgili sportshylary men ártisteri, aýyr atletıkadan álem chempıony Jasulan Qydyrbaev, erkin kúresten Sıdneı Olımpıadasynyń kúmis júldegeri Islam Baıramýkov, bokstan Olımpıada chempıony Ermahan Ybraıymov, mánerlep syrǵanaýdan Qazaqstan chempıonatynyń kúmis júldegeri jáne Qysqy Ýnıversıadynyń qatysýshysy Aıza Imambek, alpınızmnen TMD ashyq chempıonatynyń (2001-2003) joǵarǵy deńgeıdegi chempıony men júldegeri Maqsut Jumaev, «Asyl» jáne «Melomen» toptary qatysty.
Merekelik shara Melomen tobynyń óner kórsetýimen aıaqtaldy.
Ótken jyly, osy baǵdarlamanyń aıasynda jalpy 21 velosherý uıymdastyrylyp, oǵan 19 myń adam qatysqan bolatyn.
