Almatydaǵy ushaq apatynda qaza tapqandar týraly derekter nege ártúrli boldy

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń tóraǵasy Talǵat Lastaev Almaty túbindegi áýe apatynda qaza tapqandar týraly derekterdiń nelikten ártúrli bolǵandyǵyn aıtty, dep habarlaıdy QazAqparat tilshisi.

Onyń aıtýynsha, áýe apaty kezinde qaza tapqandardyń sany týraly resmı aqparatty berýge QR Іshki ister mınıstrliginiń Tótenshe jaǵdaılar komıteti ǵana berýge quqyly.

«12 adam qaza tapty, bul — atalǵan vedomstvo (ІІM) taratqan málimet. Túrli derekterdiń bolǵandyǵy da túsinikti. Degenmen, baspasóz máslıhatynda vıtse-premer jarııa etken jáne úkimettik komıssııa otyrysynda aıtylǵan sanǵa sáıkes 12 adam qaza boldy», - dedi ol Ortalyq kommýnıkatsııalar qyzmetindegi baspasóz máslıhatynan keıin BAQ ókilderine bergen suhbatynda.

Komıtet basshysynyń naqtylaı túsýinshe, mundaı qaıǵyly jaıttar kezinde resmı statıstıka berýge Іshki ister jáne Densaýlyq saqtaý mınıstrlikteriniń ǵana quqyǵy bar.

«15 adamnyń qaza tapqandyǵy týraly habarlama bastapqy aqparat bolýy yqtımal. Alaıda, resmı statıstıkany memlekettik organdardan Densaýlyq saqtaý mınıstrligi men Іshki ister mınıstrligi ǵana berýge quqyly. QR ІІM Tótenshe jaǵdaılar komıteti de qaza tapqandar týraly aqparat bere alady. Óıtkeni, izdeý jáne qutqarý operatsııasyn Tótenshe jaǵdaılar komıteti úılestiredi. Ákimdiktiń quqyǵy joq», - dedi Talǵat Lastaev.

Esterińizde bolsa, keshe Almaty qalalyq qoǵamdyq densaýlyq saqtaý basqarmasynyń basshysy Tileýhan Ábildaev «Bek Eır» ushaǵynyń apatqa ushyraýy saldarynan qaza tapqan adamdardyń sany 15-ke jetkenin aıtqan edi.