Almatydaǵy ýnıversıtetter Qonaevqa qalaı kóshiriledi

ASTANA. QazAqparat – Qonaev qalasynan akademııalyq qalashyq qurý maqsatynda keler jyly Almatydaǵy joǵary oqý oryndaryn kóshirý bastalady. Bul týraly QazAqparat tilshisiniń saýalyna jaýap bergen Ǵylym jáne joǵary bilim mınıstri Saıasat Nurbek aıtty.

«Prezıdent Qonaev qalasynan úlken akademııalyq qalashyq ashý týraly tapsyrma berdi. Almaty oblysynyń ákimdigimen tujyrymdamany daıyndadyq. Qaladan 97 gektar jer bólindi. Ol jer arnaıy ındýstrııaldyq-óndiristik alań bolady. Endi kelesi jyly osy 97 gektar jerge Almatydan qalaǵan joǵary oqý oryndaryn aqyryndap kóshirýdi bastaımyz», - dep jaýap berdi Saıasat Nurbek tilshi saýalyna oraı.

Onyń sózinshe, oqý oryndaryna kóshý úshin eki jol usynylady. Ýnıversıtetterdiń Qonaev qalasyna kóshýi erikti túrde júrgiziledi.

«Birinshisi – biz jataqhanamen jabdyqtaǵanda stýdentter sol Qonaevta turyp, sabaqqa jedel elektr poıyzdarymen baryp, keshke Qonaevqa sonymen qaıtady. Ony Almaty oblysynyń ákimdigimen pysyqtap jatyrmyz. Mundaı format kóp jerlerde bar negizi. Ekinshi – eger Almatyǵa múldem syımaı jatqan ýnıversıtet bolsa, onyń Qonaevta óz kampýsyn ashýyna bolady. Barlyǵy ýnıversıtetterdiń nıetine baılanysty erikti túrde júrgiziledi», - dep túıindedi mınıstr.

Qosa keteıik, tilshi saýalyna jaýap bergen Saıasat Nurbek jataqhana máselesin sheshý joldaryn da atap ótken bolatyn.