Almatydaǵy Úmit úıinde 40 bala tárbıelenip jatyr

ALMATY. QazAqparat – Almaty qalasy ákiminiń orynbasary Erjan Babaqumarovtyń tóraǵalyǵymen «Úmit úıi» Qamqorshylyq keńesiniń otyrysy ótti, dep habarlaıdy QazAqparat tilshisi.

Otyrysqa qalalyq bilim, qoǵamdyq densaýlyq basqarmalarynyń ókilderi, qalalyq áıelder isteri jáne otbasylyq - demografııalyq saıasat jónindegi ınspektory qatysty.

Jıyn barysynda jalǵyzbasty analarǵa kómek kórsetý sharalary qaraldy. «Úmit úıi» osy ýaqytqa deıin 617 balany tárbıelep shyǵardy.

Búgingi kúni uıymda qazaq jáne orys tilderinde oqytatyn 6 top bar. Onda 40 bala tárbıelenip jatyr. Munda týǵannan 7 jasqa deıingi balalardy tárbıeleý men oqytý úshin dene bitimi, psıhıkalyq jáne rýhanı-adamgershilik damýyna yqpal etetin barlyq qajetti jaǵdaılar jasalǵan.