Almatydaǵy Uly Otan soǵysy múgedekterine arnalǵan respýblıkalyq klınıkalyq gospıtaliniń korpýstary qalpyna keltiriledi
ASTANA. Qyrkúıektiń 1-i. QazAqparat - Almatydaǵy Uly Otan soǵysy múgedekterine arnalǵan respýblıkalyq klınıkalyq gospıtalinde osy mekemeniń basshylyǵy qoǵamdyq uıymdardyń ókilderimen, Otan soǵysynyń ardagerlerimen jáne múgedekterimen, ınternatsıonalıst jaýyngerlermen jáne Chernobyl ardagerlerimen kezdesti. Bul týraly QazAqparatqa Densaýlyq saqtaý mınıstrliginiń baspasóz qyzmetinen habarlady.
Baspasóz qyzmetiniń málimetinshe, kezdesýde Densaýlyq saqtaý mınıstrligi gospıtaldyń korpýstaryn tıisti qalpyna keltirý sharalary júrgizetini jáne alańdaýǵa esh negiz joq ekendigi týraly aıtyldy. «Aıta ketý qajet, Almaty qalasynyń Tótenshe jaǵdaılar departamenti 2010 jylǵy tamyzdyń 12-sinde korpýstardy bosatý, patsıentterdi kóshirý jáne obektiniń aýmaǵyna kirý múmkindigin shekteý týraly hat joldaǵan. Almaty qalasy ákimdiginiń «SeısmoQurylysQorǵaý» MKK kúshimen gospıtal korpýstarynyń jaǵdaıyn tolyq tehnıkalyq zertteý júrgizildi. Onyń qorytyndysy boıynsha 7 blokty buzý, qalǵan bloktardy kúrdeli jóndeýden ótkizý jáne seısmıkalyq kúsheıtý jumystaryn júrgizý qajet. Sonymen qatar gospıtal aýmaǵynan sý burǵyshtyń durys jumys isteýin qamtamasyz etý sharalar keshenin ótkizý kerek», delingen taratylǵan habarlamada.
Densaýlyq saqtaý mınıstrligi gospıtaldyń joǵarǵy korpýsynyń (Almaty qalasy, Ladýshkın kóshesi, 120 a meken-jaıy boıynsha) bazasy negizinde jańa qazirgi zamanǵa saı 240 tósek-oryndyq emdeý korpýsyn salý jáne qurylys kezinde gospıtaldyń 90 tósek-ornyn Almaty jáne Astana qalalaryndaǵy medıtsınalyq uıymdarǵa (terapevtik beıindi 40 tósek-ornyn Kardıologııa jáne ishki aýrýlar ǵylymı-zertteý ınstıtýtyna, hırýrgııalyq beıindi 10 tósek- ornyn Syzǵanov atyndaǵy hırýrgııa ulttyq ǵylymı ortalyǵyna, ýrologııalyq beıindi 10 tósek-ornyn Ýrologııa ǵylymı ortalyǵyna, terapevtik beıindi 20 tósek-ornyn Uly Otan soǵysynyń ardagerlerine arnalǵan ortalyq klınıkalyq gospıtalǵa jáne hırýrgııalyq beıindi 10 tósek-ornyn Respýblıkalyq jedel medıtsınalyq kómek ǵylymı ortalyǵyna) kóshirý týraly sheshim qabyldady. Sonymen qatar gospıtal qyzmetkerlerin jumysqa ornalastyrý máseleleri sheshiletin bolady.
