Almatydaǵy «Uly dala oıyndary» festıvalin 5 myń adam tamashalady
ASTANA. QazAqparat - Almatyda ótken «Uly dala oıyndary» Ulttyq sport túrlerinen «Uly dala oıyndary» respýblıkalyq festıvalin 5000 adam tamashalady, dep habarlaıdy dodasport.kz .
«Sporttyq Almaty» baǵdarlamasynyń aıasynda ótken sporttyq sharaǵa qatysýshylar sany boıynsha rekordtyq kórsetkishke, 600-ge jýyq sportshyǵa jetti.
Almaty ákimi Baýyrjan Baıbek óziniń quttyqtaý sózinde Qazaqstan Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» maqalasynda mádenıet pen jeke ulttyq kodty saqtaýǵa úlken nazar aýdarǵanyn aıtty.
- «Memleket basshysy elimiz táýelsizdikke qol jetkizgen kúnnen bastap tól qundylyqtarymyzdy nasıhattaý arqyly ulttyq sanany jańǵyrtýdy basym baǵyt retinde aıqyndap berdi. Sonyń arqasynda halqymyz umyt bola bastaǵan tilimen, ózindik mádenıetimen, salt-dástúrimen qaıta qaýyshty. Memleket tarapynan Ulttyq sport túrlerine, onyń ishinde kókpar, alaman báıge, aýdaryspaq, teńge ilý, jamby atý, asyq atý, toǵyzqumalaq, qazaq kúresi syndy aıshyqty is-sharalarǵa júıeli túrde qoldaý kórsetilip keledi. Bıylǵy jyldyń aıaǵyna deıin Almaty ıppodromynda júldelik qory 80 mln teńge bolatyn 89 báıge ótedi. Bizdiń qalada qazaq kúresinen «Almaty Barysy» men «Álem Barysy» saıystarynyń ótýi de sport áýesqoılary úshin erekshe syılyq bolmaq», - dedi Baýyrjan Baıbek.
«Uly dala oıyndary» respýblıkalyq festıvaline qatysýshylar sporttyń 8 túri boıynsha saıysqa tústi, olardyń ishinde, at jarystary (4 km taı jarys, 7 km qunan báıge, 13 km top báıge, jaıdaq báıgeler, 21 km alaman báıge), kókpar, aýdaryspaq, teńge ilý, toǵyzqumalaq, asyq atý, jamby atý, qazaq kúresi syndy ulttyq sport túrleri bar.
Álbette, kórermenniń kóńilinen shyǵyp, shabyttandyrǵan, júırik shabandozdar qatysqan aıtýly doda - kókpar. Aqtyq báıgede OQO «Qulager» men «Áýlıeata» komandalary ózara myqtyny anyqtady. Jarys nátıjesi boıynsha 9:1 eseppen, OQO shabandozdary altyndy oljalady.
- Jeńis bizge ońaı berilgen joq. Bizdiń ujymnyń basym bóligi jas sportshylar, biraq, biz bar kúshimizdi salyp, kókpardan on jetinshi Qazaqstan chempıonatyn jeńdik. Osy jyly jańa erejeler engizilgendikten, biz ózimizdiń ádisterimizdi qoldandyq. Qazir qazandyqtyqtyń ornyn jerdegi sheńber almastyrdy, bul álde qaıda jeńilirek. Búgingi mereke úshin barlyq uıymdastyrýshylarǵa degen alǵysym sheksiz. Barlyǵyn ulttyq sport túrlerimen aınalysýǵa shaqyramyn, biz árqashan kómektesýge daıynbyz! - deıdi OQO komandasynyń bas bapkeri Baqtybaı Shyrynqulov.
Aıta ketsek, bıylǵy júldelik qor 24 mln teńgeni qurady. Júldeli oryn ıelenýshilerine aqshalaı syılyqtar tabystaldy: «Qunan báıge» - 2 ml., 1 mln, 500 myń, 300 myń, 200 myń teńge, «Alaman báıge» - 4 mln, 2 mln., 600 myń, 500 myń, 300 myń teńge, «Top báıge» - 3 mln, 1,5 mln, 600 myń, 400 myń, 200 myń teńge, «Taı jarys» - 300 myń, 200 myń, 100 myń teńge, «Kókpar» - 1,5 mln, 1 mln, 800 myń teńge.
Negizgi oıyndar men qatar, festıval qonaqtary búrkitterdiń, ańshylyq tazy ıtterdiń, qoldan jasalǵan qoldanbaly buıymdardyń kórmesin tamashalady. Sonymen qatar, qonaqtar myń buralǵan bıshilerdiń, teatrlyq qoıylymnyń, Qazaqstan estrada juldyzdarynyń qatysýymen ótken kishigirim kontserttik baǵdarlamasyna kýá bolyp, tamasha áser alyp qaıtty.
Festıval sportshylardy marapattaý rásimimen máresine jetti. Qazaqstan Respýblıkasy ulttyq sport túrleri qaýymdastyǵynyń prezıdenti Bekbolat Tileýhan sóz alyp, kelgen qonaqtarǵa kórsetken qoldaýy úshin rızashylyǵyn bildirdi. Jeńimpazdar men júldegerlerge gramotalar, medaldar men kýboktardy áıgili sportshy Jaqsylyq Úshkempirov pen qoǵam qaıratkeri Bekbolat Tileýhan tabystady.
«Uly dala oıyndary» respýblıkalyq festıvali «Sporttyq Almaty» jobasy aıasynda osymen ekinshi márte, alyp shaharda ulttyq pen buqaralyq sportty damytý maqsatynda ótti.
