Almatydaǵy úlken aınalma joldyń naqty baǵasy qandaı
ASTANA. QazAqparat - QR Investıtsııalar jáne damý mınıstrligi Almatydaǵy úlken aınalma jolynyń qurylysyna jumsalatyn qarjy kóleminiń ózgergenin málimdedi, dep xabarlaıdy QazAqparat tilshisi.
Avtomobıl joldary komıtetiniń tóraǵasy Mereke Pishembaevtyń aıtýynsha, qazirgi kezde mınıstrlik atalǵan qurylyspen aınalysatyn ınvestormen kelissózder júrgizip jatyr.
«Bári oıdaǵydaı bolsa, 2018 jyly qurylys jumystary bastalady. Eger biz kelisetin bolsaq, onda jylyń aıaǵynda kelisimshartqa qol qoıylady. Alǵashqy jobanyń quny 44 mlrd bolǵan. Alaıda ol úsh jyl buryn jasalǵan edi. Qazirgi kezde biz ony jańarttyq. Sóıtip, qurylystyń jalpy sommasy 150 mlrd teńgege shyǵyp otyr. Konkýrs boıynsha bir kúrdeli jóndeý jáne eki ortasha jóndeý qarastyrylǵan», - dedi Pishembaev búgin Astanada ótken baspasóz máslıxatynda.
Onyń sózine qaraǵanda, jobanyń quny ózgerýi ábden múmkin.
Aıta ketken jón, aǵymdaǵy jyly aqpan aıynda Almaty qalasynyń ákimi Baýyrjan Baıbek Almatydaǵy úlken aınalma jolynyń qurylysyna shamamen 350 mıllıard teńge ketedi dep málimdegen.
«Atalǵan joldyń arqasynda Almaty qalasyn Batys Qytaı men Eýropa arasyndaǵy logıstıkalyq xab retinde damytýǵa bolady. Osy jobaǵa shamamen 350 mlrd teńge ketedi. Sol jerde myńdaǵan jumys oryndaryn quryp, almytylyq kompanııalardy keńinen tartýǵa bolady», - dedi Baıbek xalyq aldyndaǵy esep berý kezdesýinde.
