Almatydaǵy úleskerlerdiń 80 paıyzynyń máselesi sheshildi - Almatydaǵy keńes
ALMATY. 24 qańtar. QazAqparat /Názıra Eleýhan/- Ótken jyly Almatyda jalaqy 4,8%-ǵa ósti. Jumyssyzdyq deńgeıi 7,3%-dan 5,8%-ǵa tómendedi. Jumyspen qamtý 3,8%-ǵa artty.
Bul týraly búgin Almaty ákimdiginde qala basshysynyń tóraǵalyq etýimen ótken 2010 jyldyń áleýmettik- ekonomıkalyq damý qorytyndysyna arnalǵan keńeste Ekonomıka jáne bıýdjettik josparlaý basqarmasynyń bastyǵy Sardar Qabdolov aıtty.
Onyń aıtýynsha, buny depozıtterdiń óskendigi de rastaıdy. "Zańdy tulǵalar depozıti 13,9%-ǵa ósti. Adamdar qaıtadan bankke aqsha sala bastady. Jeke tulǵalardyń salymy 8%-ǵa nemese 999,6 mlrd. teńgege ósti", - dep atap ótti ol.
Sardar Qabdolovtyń aıtýynsha, ótken jyly turǵyn úı kesheni boıynsha eki memlekettik baǵdarlama aıaqtalǵan. "Baǵdarlama aıasynda 820,2 myń sharshy metr iske qosyldy nemese 10,5 myń páter berildi. Almatydaǵy úleskerlerdiń 80 paıyzynyń máselesi sheshildi. Olardyń jalpy sany - 16201. 2011 jyly taǵy da 3370 úlesker máselesi sheshiletin bolady", - dedi ol.
Qala ákimi Ahmetjan Esimov keńeste úlesti qurylysqa erekshe nazar aýdarý qajettigin qadap turyp aıtty, sonymen qatar, «Samuryq-Qazyna» UÁQ men Almaty qalasy ákimdigi arasynda jasalǵan Memorandýmnyń oryndalýyn baqylaýdy tapsyrdy.
Sardar Qabdolovtyń aıtýynsha, 2010 jyly naqtyly bıýdjet 267 mlrd. teńgeni qurap, transport ınfraqurylymynnyń ınvestıtsııasyna memlekettik resýrstardan 59 mlrd teńge bólingen. "Ótken jyly 52,5 km jańa jol salyndy, 6,7 km. jol jóndeldi. 200,3 km . avtomobıl joly ortasha jóndeýden ótti",-dedi ol.
Jol máselesin qatysty qala basshysy: «Jol tasymalynyń sapasyna erekshe kóńil bólip, baǵyttardy ońtaılandyrý qajet», - dep atap ótti.
