Almatydaǵy TJO-larda baqylaýsyzdyqtan avtokólikter jıi urlanýda
ALMATY. 11 sáýir. QazAqparat /Ádilet Musahaev/ - Almaty polıtsııasy kólik aıdap áketý oqıǵasyn tirkeýdi jalǵastyrýda, kóbinde qylmys jasaýshylar TJO jumysshylary, nemese avtokólik jýýshylar.
Ańqaýlardyń biri 29 jastaǵy jigit óziniń «Leksýs» avtokóligin «Samal» aýdanyndaǵy kólik jýý ornyna qaldyryp ketken. «Aıdap áketilgen kóliktiń ıesi aryzdanǵan soń qalamyzda «Quryqtaý» operatsııasy josparlandy. Jol polıtsııasy basqarmasynyń qyzmetkerleri turǵyn úıler aýlasynyń birinen qoldy bolǵan avtokólikti baıqap qalady. Polıtsııany kórgen rólde otyrǵan adam kólikti tastaı salyp, jaıaý qashyp qutylmaq bolady. Biraq alysqa uzamaıdy. Ury sol kólikti jýǵan adam bolyp shyqty jáne buryn da ózgeniń múlkin urlaǵany úshin sottalǵan eken. Medeý aýdandyq ІІB -da ózgeniń múlkin zańsyz ıelengeni úshin qylmystyq is qozǵaldy»,-dep málimdedi Almaty qalalyq ІІD Jol polıtsııasy basqarmasy bastyǵynyń orynbasary polıtsııa polkovnıgi Muhtar Túsúpov.
Ózgeniń kóligine mingendi jany qalaıtyn azamattyń biri qalamyzdaǵy TJO-nyń 30 jastaǵy kúzetshisi bolyp shyqty. Kóligin jóndeýge qaldyryp ketken klıenttiń «BMV» avtokóligin alyp, qalada túnde serýen qurǵan. Ony jol polıtsııasynyń qyzmetkerleri qala syrtyna kólikti aıdap shyqpaqshy bolǵanda qolǵa túsirgen.
«Tehnıkalyq jóndeý ortalyǵy ıeleriniń tarapynan baqylaýsyzdyqtyń joqtyǵy avtokólikterdiń jıi urlanýyna ákep soqtyrady. Munymen qatar, TJO ákimshiligi jumysqa qabyldar aldynda keleshek kyzmetkerleriniń materıaldyq jaýapkershiligi týraly eshqandaı kelisimshart jasamaıdy. Bul sońynan olarǵa materıaldyq jaýapkershilik artýǵa múmkindik bermeıdi», - dep atap ótti óz sózinde polkovnık M.Túsúpov.
