Almatydaǵy túzeý mekemesinde otyrǵan áıelder ondaǵy zańsyzdyqtarǵa shaǵymdandy
ALMATY. QazAqparat - Almatyda soqqyǵa jyǵylǵan túrmedegi kelinshekterdiń janaıqaıyna qatysty máseleni QR ІІM qylmystyq atqarý júıesi komıtetiniń ókilderi tekserýde, dep habarlaıdy QazAqparat tilshisi.
Bul týraly áleýmettik jelide quqyq qorǵaýshy Elena Semenova jarııalaǵan bolatyn.
Belsendi azamat QR Bas prokýroryna júgindi.
«Qurmetti prokýror! Almatydaǵy LA - 155/1 túzeý mekemesinde qamaýda otyrǵan áıelder 4 kún qatarynan ashtyq jarııalap otyr. Olardyń ishinde 6 aılyq júkti kelinshek bar. Ashtyq jarııalaýǵa mekeme qyzmetkerleriniń aıaýsyz tepkisi túrtki bolyp otyr. Bir áıeldi uryp tastaǵan, aýyr dene jaraqaty bar dep keshe 115 nómirine tergeý ızolıatorynan áıelder habarlasqan. Tún ishinde qyzmetkerler kelip soqqy jegen áıeldi alyp ketken. Al júkti áıel ózine qol salýǵa tyrysty. Ashtyq jarııalap, aýzyn tigip tastaǵan er adam da joq bolyp ketti», - dedi Elena Semenova Feısbýktegi paraqshasynda.
Atalǵan derekke baılanysty qazir QR ІІM qylmystyq atqarý júıesi komıtetiniń ókilderi tekserýdi bastady.
«Qazirgi tańda bul aqparat tekserilip jatyr. Eger bul derek rastalsa, Qazaqstan zańnamasy boıynsha shara qabyldanady», - dedi baspasóz qyzmetindegiler.
