Almatydaǵy týrnırde 11 elden 200-den astam atlet baq synaıdy
NUR-SULTAN. QazAqparat - Erteń, ıaǵnı 6-shilde kúni Almatyda jeńil atletıkadan dástúrli halyqaralyq Ǵusman Qosanov memorıaly bastalady, dep habarlaıdy QazAqparat tilshisi.
Eki kúnge sozylatyn dodaǵa bıyl 11 memleketten 200-den asa sportshy qatysady dep kútilýde. Olardyń arasynda Qazaqstan, Grýzııa, Iran, Kýveıt, Qyrǵyzstan, Túrikmenstan, Ázerbaıjan, Ózbekstan, Tájikstan, Úndistan quramalary bar. Sondaı-aq, beıtarap sportshy retinde Eýropanyń eki dúrkin chempıony, álem chempıonatynyń kúmis júldegeri Darıa Klıshına shaqyrylǵan.
Jeńil atletıkadan dástúrli halyqaralyq Ǵusman Qosanov memorıaly 1991 jyldan bastaý alǵan bolatyn. Mine, bıyl atalmysh jarys 29-ret uıymdastyrylǵaly otyr.
Aıta keteıik, Ǵusman Syıtyquly Qosanov 1935 jyly 25 mamyrda Shyǵys Qazaqstan oblysy, Besqaraǵaı aýdany, Izatýlla aýylynda dúnıege kelgen. Olımpıada oıyndaryna tuńǵysh ret qatysqan jáne Olımpıada júldesin birinshi bolyp jeńip alǵan qazaq atleti.
Ol 1960 jyly Rım olımpıadasynda kúmis medalge ıe boldy. Italııa astanasynda 4h100 estafetalyq jarysta KSRO qurama komandasy sapynda L. Bartenev, ıÝ. Konovalov, E. Ozolındermen birge márege ekinshi keldi. Qosanov sondaı-aq 1960 jylǵy Olımpıada oıyndarynda 100 metrlik qashyqtyqta da jarys alańyna shyqqan bolatyn. Jekeleı synda 10,7 sekýnd nátıjesimen jalpy esepte 6-orynǵa taban tiredi.
Ǵusman Qosanovtyń basqa da ataqtary jeterlik. Eýropa chempıony, KSRO chempıonatynyń kúmis júldegeri, Qazaqstannyń birneshe dúrkin chempıony, KSRO halyqtary spartakıadasynyń jeńimpazy. Tipti, jeńil atletıkadan qazaq jastary arasynan shyqqan tuńǵysh sport sheberi.
