Almatydaǵy tıin buzylatyn boldy
ALMATY. QazAqparat – Almatyda Atakenttegi alyp tıin buzylady, dep habarlaıdy QazAqparat tilshisi.
Búgin art nysannyń «erteńi» týraly qalalyq Mádenıet basqarmasynyń basshysy Ernar Qurmashev aıtty.
«Tıindi órteımiz degen sheshim bar edi. Biraq, órtemedik. Aýdan ákimine art nysandy buzý týraly tapsyrma berildi. Jalpy jartylaı qıraǵan, estetıkalyq túrin joǵaltqan barlyq shaǵyn arhıtektýralyq pishinder buzylady. Bul qala ákiminiń tikeleı tapsyrmasy. Jaqynda kóptegen art nysandardyń, kishi arhıtektýralyq pishinderdiń aýdıti jasaldy. Qalanyń kelbetine nuqsan keltiretin nysandar sýretke túsirildi», - dedi Ernar Qurmashev.
Mádenıet basqarmasy basshysynyń aıtýynsha, aldaǵy ýaqytta qaladaǵy árbir art nysandy ornatarda kórkemdik keńes shaqyrylatyn bolady.
Buǵan deıin qala bıligi Atakenttegi tıinniń túri ózgeretinin habarlaǵan bolatyn.
