Almatydaǵy tergeý ızolıatorynda ortaǵasyrlyq ınkvızıtsııa úlgisindegi «azaptaý kameralary» bar - feık

NUR-SULTAN. QazAqparat – Almatydaǵy tergeý ızolıatorynda ortaǵasyrlyq ınkvızıtsııa úlgisindegi «azaptaý kameralary» bar degen aqparat jalǵan. Bul týraly QR Qylmystyq-atqarý júıesi komıteti tóraǵasynyń orynbasary Meıram Aıýbaev aıtty, dep habarlaıdy QazAqparat tilshisi.

«Qazirgi ýaqytta aqparat keńistiginde tergeý ızolıatorlary qabyrǵasynda jasalǵan zorlyq-zombylyq delingen jalǵan habarlamalar jappaı taratylyp jatyr. Olardyń shyndyqqa janaspaıtyndyǵyn, qoǵamdy adastyratyndyǵyn jáne oryn alyp jatqan shynaıy jaıtty burmalaıtyndyǵyn jaýapkershilikpen málimdeımiz. Tipti onymen qoımaı, Qazaqstannyń syrtynda júrgender Almatydaǵy tergeý ızolıatorynda ortaǵasyrlyq ınkvızıtsııa úlgisindegi «azaptaý kameralary» bar degen «feık» habar taratyp jatyr. Bul múlde jalǵan jáne múmkin emes aqparat»», -dedi Meıram Aıýbaev Іshki ister mınıstrliginiń baspasóz qyzmeti alańynda ótken brıfıngide.