Almatydaǵy taýda jasandy qar kóshkini júrgizildi
ALMATY. QazAqparat - Almatyda qar kóshkinin profılaktıkalyq túsirý jumystary júrgizildi. Bul týraly qalalyq TDJ baspasóz qyzmeti málim etti, dep habarlaıdy QazAqparat tilshisi.
«Turǵyndar men týrısterdiń qaýipsizdigin qamtamasyz etý maqsatynda jáne Úlken jáne Kishi Almaty ózenderiniń basseınderinde kóshkinderdiń ózdiginen túsýine baılanysty 24 qarashada «Shymbulaq» taý shańǵy kýrorty aýmaǵynda qar túsirý jumystary júrgizildi», - dep habarlady Almaty qalalyq TJD baspasóz qyzmeti.
Jasandy kóshkin kezinde kólemi 1 myń tekshe metr qar massasy taý etegine tústi. Júrgizilgen jumystardyń nátıjesinde «Shymbulaq» demalýshylarynyń qaýipsizdigi qamtamasyz etildi
Departament taratqan málimetke sáıkes, Almatynyń taýly aımaǵynda qar kóshkini qaýpi bar 165 ýchaske bar, onyń ishinde qala turǵyndary men týrısteri úshin eń úlken qaýiptileri - «Medeý», «Shymbulaq» TShK jáne Úlken Almaty kóli aýdanynda ornalasqan 18 ýchaske.
«Qazgıdromet» RMK jáne «Qazseldenqorǵaý»MM beketteri qar kóshkini jaǵdaıyna turaqty monıtorıng júrgizedi. Shuǵyl sharalarǵa «Qazseldenqorǵaý» MM Almaty qalalyq paıdalaný-tehnıkalyq basqarmasynyń bazasynda avarııalyq-mehanıkalandyrylǵan brıgada qurylyp, turaqty daıyndyqqa kirisedi»,- dep atap ótti vedomstvodan.
Sonymen qatar, taýly aýdandarda jaýyn-shashynnyń túsýi jáne qar jamylǵysynyń turaqsyz jaǵdaıy saldarynan qar kóshkininiń ózdiginen túsýi múmkin.
Osyǵan baılanysty, Almaty qalasy TJD qar kóshkininiń yqtımal erýine baılanysty tik qarly betkeılerge shyǵýǵa tıym salady.
