Almatydaǵy «Taý samaly» yqshamaýdanynda dárigerlik ambýlatorııa ashyldy
ALMATY. QazAqparat - Almatydaǵy «Taý samaly» yqshamaýdanynyń 6 myńnan astam turǵyny úshin «Shetsiz qala - shekarasyz medıtsına» baǵdarlamasy aıasynda dárigerlik ambýlatorııa ashyldy, dep habarlaıdy QazAqparat tilshisi.
Bul №5 qalalyq klınıkalyq aýrýhana janynan ashylǵan alǵashqy dárigerlik ambýlatorııa.
«Osy aýdanda turatyn barlyq adamdarǵa esik ashyq. Kelýshiler dáriger men medbıkege keńesine júgine alady.Sondaı-aq, kúndizgi statsıonarda emdelýge, ekpe alýǵa, qan saraptamalaryn jasatýǵa múmkindik bar. Elektrokardıogrammadan ótkizý, dári-dármekterge retsept alý sııaqty qyzmetterde kórsetiledi. Dıspanserlik naýqastardyń ózderi dári-dármekter alady. Endi yqsham aýdan turǵyndaryna medıtsınalyq kómek alý úshin emhanaǵa barýdyń qajeti joq», - dedi Almaty qalalyq qoǵamdyq densaýlyq saqtaý basqarmasynyń bastyǵy Qanat Tósekbaev.
9 tósektik kúndizgi statsıonary bar dárigerlik ambýlatorııanyń ashylý rásimine kelgen turǵyndar rızashylyqtaryn bildirdi.
«Meniń bul aýdanda turyp jatqanyma 17 jyl boldy. Men arterııalyq gıpertonııa dıspanserinde tirkeýde turmyn. Dáriger kúndizgi statsıonarda ınfýzııalyq tamshyǵa arnalǵan kýrsty taǵaıyndady. Men №5 aýrýhanadaǵy kúndizgi statsıonarǵa baryp júr edim. Ol jerde tórt protsedýradan óttim, qazir osynda jatyrmyn, qalǵan sıstemamdy alamyn. Turǵyndardyń bári rıza. Bizdiń ýchaskelik dárigerimiz endi osy ambýlatorııada qabyldaıtyn boldy», - dedi shaǵyn aýdan turǵyny Kenjehan Qaıdarova.
Barlyq qyzmetter tegin medıtsınalyq kómektiń kepildendirilgen kólemi aıasynda kórsetiledi.
