Almatydaǵy taý bókterine shyǵýǵa tyıym salyndy
ALMATY. QazAqparat – Almatyda qar kóshkini júrý qaýpine baılanysty taý bókterine shyǵýǵa tyıym salynady, dep habarlaıdy QazAqparat tilshisi qalalyq Tótenshe jaǵdaılar departamentiniń baspasóz qyzmetine silteme jasap.
Departament taratqan málimetke qaraǵanda, jylymyq kezde jaýyn-shashynnyń mol túsýine jáne qar jamylǵysynyń turaqsyzdyǵy men bıiktiginiń joǵary bolýyna baılanysty Úlken jáne Kishi Almaty sý alaptarynda 13-16 sáýir aralyǵynda qar kóshkini qaýpi saqtalady.
«Kóshkin júrý qaýpi yqtımal bolýyna baılanysty, qarly tik jartastarǵa shyǵýǵa bolmaıdy. Taýda abaı bolyńyzdar» delingen vedomstvanyń habarlamasynda.
Qazgıdromet aýa raıy boljamyna sáıkes 13 sáýirde respýblıkanyń basym bóligine antıtsıklon jotasynyń yqpal etýine baılanysty jaýyn-shashynsyz aýa raıy saqtalady.Tek ońtústik jáne soltústik-shyǵys aımaqtarda atmosferalyq frontaldy bólikterdiń ótýine baılanysty keı jerlerde jaýyn-shashyn (qar, jańbyr) kútiledi. Keı jerlerde tuman, jeldiń kúsheıýi kútiledi, ońtústikte naızaǵaı, burshaq bolady.
