Almatydaǵy «Tastaq» bazary mańynda «jabaıy saýda» jasaǵandarǵa shara qoldanyldy
ALMATY. QazAqparat - Almaty qalasynyń «Tastaq» bazary mańynda zańsyz «jabaıy saýda» jasaǵan 80-ge jýyq adamǵa aıyppul salyndy.
Jyl basynan beri arnaıy belgilenbegen oryndarda saýda jasaǵany úshin jalpy somasy 8 mln. 972 myń teńgege ákimshilik is qozǵaldy. Polıtsııa málimetinshe, atalǵan quqyq buzýshylyq qalalyq bazarlary men basqa da qoǵamdyq jerlerdiń aınalysynda anyqtalýda.
Taıaýda Almaly aýdanynyń ýchaskelik ınspektorlary «Tastaq» bazary mańyndaǵy «jabaıy saýdany» joıý boıynsha jáne oǵan jol bermes úshin kezekti reıd ótkizdi.
«Nátıjesinde, reıdtik sharalardyń birinshi saǵatynda ákimshilik jaýapkershilikke zańnamany buzǵan 20-dan astam adam tartyldy, al ótken bir kúnniń qorytyndysy boıynsha bul kórsetkish 80-ge jýyqtady. Buǵan deıin saýdagerlerge birneshe márte eskerý jasalǵan bolatyn. Alaıda, olardyń keıbiri bul eskertýlerdi elemedi. Bul rette «jabaıy saýda» men Brýsılovskıı kóshesi boıymen zańsyz jaıma saýdany uıymdastyrýdy aıtyp otyrmyz. Kókónis, jemis-jıdek, qurylys materıaldaryn saýdalaıtyn adamdar jalpylaı paıdalanatyn oryndarǵa ornalasyp alǵan. Osynyń saldarynan, jaıaý júrginshilerdiń qozǵalysyna kedergi keltirilip, qoldan jasalǵan keptelis joldaǵy qozǵalysqa keri áser etýde»,-dedi Almaty qalasy ІІD Ákimshilik polıtsııa basqarmasynyń basshysy Nurlan Almasbekov.
Onyń sózine qaraǵanda, jyl basynan beri ákimshilik polıtsııa qyzmetteri men bólimsheleri qyzmetkerleri jáne jergilik polıtsııa qyzmeti usaq quqyq buzýshylyq pen tártipsizdikke «nóldik tózimdilik» ustanymy boıynsha 212 myńǵa jýyq ákimshilik zańnamany buzý faktisin anyqtady. Salynǵan aıyppuldyń kólemi 3 mlrd. 120 myń teńgeni qurady.
