Almatydaǵy tarıhı kitap dúkeni 66 mln teńgege satylmaq
ALMATY. QazAqparat - Almatydaǵy belgili ári tarıhı «Akademkitap» dúkeni osy aıdyń sońyna deıin ǵana jumys isteıdi. Bul týraly «Facebook» áleýmettik jelisinde dúkenge barýshylardyń biri jazdy, dep habarlaıdy QazAqparat tilshisi.
«Onyń sebebi búgingi kún úshin mańyzdy emes. Óıtkeni, «Akademkitap» dúkenine ıelik etýshi jaýapkershiligi shekteýli seriktestik quryltaıshylarynyń biri Qazaqstannan kóship ketýge bel býǵan. Sol sebepti olar dúkendi satyp jibergen. Endi tek Gogol kóshesindegi «Akademkitap» dúkeni ǵana qalady. Onda ne bolatyny belgisiz... Meniń estýimshe, dúken bir aı jumys jasap, jabylady. Menińshe, bul dúkenniń jabylýy - tutas tarıhı dáýirdiń aıaqtalǵanymen birdeı», - dep jazdy jeli qoldanýshysy Alnur Ilyashev.
«Akademkitap» qyzmetkerleri dúkenniń jabylǵaly jatqany týraly aqparatty rastady. Alaıda, onyń quny men jabylý sebebin ataýdan bas tartty.
«Tek Fýrmanov pen Kalının (búgingi Qabanbaı batyr kóshesi - red. ) kóshesindegi fılıaly ǵana jabylady. Gogol kóshesindegi dúken sol satýshylarymen, sol burynǵy jumys kestesimen qyzmetin jalǵastyra beredi», - dedi dúken satýshysy Lıýdmıla Kokorına.
Aıta keteıik, Almatydaǵy kóne ǵımarattardyń biri satylatyny týraly habarlama Krysha.kz saıtynda jarııalanǵan. Onda ǵımarattyń quny 66 800 000 teńge dep kórsetilgen.
«Akademkitap» dúkeni 1950 jyly ashylǵan. 
