Almatydaǵy tamaqtaný oryndaryna keshki 23:00-ge deıin jumys isteýge ruqsat berildi
ALMATY. QazAqparat - Almaty qalasynyń memlekettik bas sanıtar dárigeri Jandarbek Bekshın 25 mamyrdan bastap jumys isteıtin kafe men tamaqtaný oryndaryna qoıylatyn talaptardy atady, dep habarlaıdy QazAqparat tilshisi.
«Kafelerge qoıylatyn talap: ujymdyq keshter men banketter ótkizýge tyıym salynady. Qoǵamdyq tamaqtaný oryndaryna keshki saǵat 23:00 -ge deıin jumys isteýge ruqsat berdik. Eń bastysy, ústelder arasyndaǵy qashyqtyq keminde eki metr bolýy kerek. Dastarhanǵa bir otbasy múshelerin qospaǵanda, tórt adamnan artyq otyrýǵa bolmaıdy», - dedi ol.
Jandarbek Bekshın qyzmet kórsetetinderdi, sanıtarlyq talapty saqtaýǵa shaqyrdy.
«Kelgenderge qyzmet kórsetetin personaldar mindetti túrde maska taǵyp, qolǵap kııý tıis. Árbir klıentten keıin dezınfektsııalaý quraldaryn qoldana otyryp tazalaý júrgizilýi kerek. Sonymen qatar, áleýmettik qashyqtyq saqtalýy qajet. Jiti respıratorlyq vırýstyq ınfektsııa bar jáne qyzýy kóterilip turǵan adamdar jumysqa jiberilmeıdi. Munyń bárin ákimshilik qadaǵalap otyrýy tıis. Biz ashanalardaǵy óz-ózine qyzmet kórsetý prıntsıpin joıdyq. Daıyn taǵamdy qyzmetkerler ózderi jetkizedi. Osy salada qyzmet kórsetetinderdi sanıtarlyq talapty saqtaýǵa shaqyramyn», - dedi ol.
