Almatydaǵy taksı júrgizýshilerine sanıtarlyq talap kúsheıtildi
ALMATY. QazAqparat – Almatyda koronavırýstyń keń taralýyna baılanysty júrgizýshilerge qoıylatyn talap kúsheıtildi , dep habarlaıdy QazAqparat tilshisi.
Almaty qalalyq taýarlar men qyzmetterdiń sapasyn baqylaý departamentiniń habarlaýynsha, qalada resmı tirkelgen taksı qyzmeti jumys isteı beredi. Biraq olar sanıtarlyq talapty oryndaýlary tıis. Arnaıy qyzmet kórsetetin jeńil kólikte eki adamnan artyq jolaýshy otyrmaýy kerek.
«Arnaıy qyzmet kórsetetin jeńil kólikte júrgizýshini qosqanda, eki adamnan artyq jolaýshy bolmaýy kerek, jolaýshylar bir-birinen óte alshaq otyrýy úshin olar shahmat tártibimen (qıǵash) ornalasýy tıis. Jeńil kólikter jeke qorǵanys quraldarymen (medıtsınalyq maska jáne antıseptıktermen) qamtamasyz etilýi qajet. Júrgizýshi mindetti túrde maska taǵyp otyrýy tıis», - dedi Almaty qalalyq taýarlar men qyzmetter sapasyn jáne qaýipsizdigin baqylaý departamenti.
