Almatydaǵy Syzǵanov atyndaǵy Ulttyq hırýrgııa ǵylymı ortalyǵyna quny 4 232 693 teńge bolatyn medıtsınalyq quraldar tabystaldy
ALMATY. 6 aqpan. QazAqparat /Názıra Eleýhan/ - Búgin «AıALA» qaıyrymdylyq qory Qazaqstan Respýblıkasynyń balalar kardıohırýrgııasyn damytý jónindegi «Meniń de ómir súrgim keledi» jobasy
aıasynda jalpy quny 4 232 693 teńgege satyp alynǵan medıtsınalyq qural-jabdyqtardy Syzǵanov atyndaǵy Ulttyq hırýrgııa ǵylymı ortalyǵyna (UHǴO) tabystady.
Hırýrgııalyq quraldar joǵary sapadaǵy materıaldardan jasalǵan jáne júrekterinde týabitti aqaýy bar kishkentaı sábı-patsıentterge jasaıtyn arnaıy operatsııaǵa arnalǵan.
Tabystaý rásiminde «AıALA» qaıyrymdylyq qorynyń vıtse prezıdenti Jangeldi Sársenov: «Bizdiń qor balalar kardıohırýrgııa máselesimen 2008 jyldan bastap aınalysyp keledi. Al «Meniń de ómir súrgim keledi» jobasyn iske asyrý barysynda balalar kardıohırýrgııasyndaǵy máselelerdi sheship, damytýǵa osy ýaqytqa deıin jalpy somasy 45 888 103 teńge qarajat jumsaldy. Árıne, ol bizdiń demeýshilerimiz ben seriktesterimizdiń arqasynda múmkin boldy. Ár jyldary bizge Dialin, Halyk bank, Viled, KazStroıServıs sııaqty kompanııalar kómek berdi, birneshe jeke tulǵalar úlken qaıyrymdylyq jasady, qarajat ár-túrli qaıyrymdylyq sharalar ústinde de jınaldy. Atap óterim, búgingi medıtsınalyq quraldardy alǵan aqsha «Qaǵanat» ashanalary men «Eır Astana» áýebıletterin satyp alatyn keńselerde ornatylǵan jáshikterden jınaldy, ıaǵnı qarapaıym adamdardan jınalǵan qarajatqa satyp alyndy. Biz sol úshin barlyq meıirimdi de, jomart adamdarǵa alǵysymyzdy bildiremiz. Osyndaı qaıyrymdy jandardyń arqasynda Syzǵanov atyndaǵy Ulttyq hırýrgııa ǵylymı ortalyǵynda 2010 jyly 292 sábıge operatsııa jasalsa, 2011 jyly 282 balaǵa operatsııalar jasaldy (onyń ishinde, 34-i - 1 jasqa tolmaǵandar, 58-i - 3 jasqa tolmaǵandar), ıaǵnı kómek kórsetken adamdar 500-den asa balanyń ómirin aman saqtap qaldy. Onyń ishinde salmaǵy 10 kelige jetpeıtin 150-ge jýyq nárestege operatsııa jasaldy. Buryn mundaı operatsııalardy jasaý múmkin emes edi», - dedi óz sózinde.
Onyń aıtýynsha, 2011 jyly qaıyrymdylyq qorlar kómeginiń arqasynda UHǴO-nyń eki ÝDZ dárigerleri biliktilikterin kóterý úshin Tomsk kardıoortalyǵyna mamandandyrylýǵa jiberilgen, al 2009 jyly atalmysh ortalyqtyń dárigerleri Bergamo qalasynyń kardıohırýrgııa klınıkasynda biliktilikterin kóterý kýrstarynan ótken. Jáne dárigerlerdiń Italııadan kelgenderinen keıin, salmaqtary 10 kelige jetpeıtin balalarǵa operatsııalar jasaý sheberligi arta túsken.
