Almatydaǵy Sulpak dúkeni mańynda aǵash kóshetteri otyrǵyzylady
ALMATY. QazAqparat- Almaty ákimi Erbolat Dosaevpen kezdesý barysynda Almaly aýdanynyń turǵyndary Sulpak turmystyq tehnıka dúkeni mańyndaǵy qýrap qalǵan kóshet máselesin kóterdi, dep habarlaıdy QazAqparat tilshisi.
«Aldyńǵy kezdesýde Sulpak ǵımaratynyń janynda egilgen kóshetter máselesi kóterilgen edi. Meniń tapsyrmam boıynsha sońǵy eki jylda aýdanda otyrǵyzylǵan 3 myń kóshetke tekserý jumystary júrgizildi, osy kúzde qyzmet kórsetetin uıymdardyń qarajat esebinen 90 túp kóshet otyrǵyzylady»,- dedi qala ákimi.
Onyń aıtýynsha, Almaly aýdanynda 223 myń aǵash bar, onyń 25%–y apatty jaǵdaıda. Jyl basynan beri 6,6 myńnan astam aǵashqa sanıtarlyq kesý júrgizilgen jáne 250 apatty aǵash otaldy. Onyń ornyna kúzde 2,5 myń kóshet otyrǵyzylady.
«Qala aýlalarynda 5 myń apatty aǵashtardy kesý josparǵa engen, olardyń 800–i Almaly aýdanynda»,- dedi Erbolat Dosaev.
Eske salaıyq, 2020 jyldyń qarasha aıynda Sulpak Almatyda saýda úıiniń janyndaǵy jaıqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi. Keıin Almaty qalalyq jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady. Prezıdent Almatyda aǵashtardy kesken kinálilerdi jaýapkershilikke tartýdy tapsyrdy.
Byltyr Sulpak dúkeni aldyndaǵy aǵashtardyń otalýyna qatysty is sotqa berildi. Sot atalǵan is boıynsha kináli adamǵa 4 mıllıon teńgeden astam aıyppul saldy.
