Almatydaǵy sýburqaqta toq soqqan áıel aýrýhanadan shyqty
ALMATY. QazAqparat - Almaty tsırkiniń janyndaǵy sýburqaqta toq soqqan 28 jastaǵy áıel aýrýhanadan shyqty. Bul týraly Almaty qalalyq Qoǵamdyq densaýlyq basqarmasy málim etti, dep habarlaıdy QazAqparat tilshisi.
«Naýqas úıine shyǵaryldy, ol barlyq qajetti medıtsınalyq kómekti tolyq kólemde aldy, jaǵdaıy turaqty. Odan ári baqylaýdy tirkelgen jeri boıynsha emhananyń dárigerleri júrgizedi», - dep habarlady Almaty qalalyq qoǵamdyq densaýlyq saqtaý basqarmasynan.
Eske salaıyq, 19 maýsym kúni Almaty tsırki mańyndaǵy sýburqaqta birneshe adamdy toq soqty.
Keıin ákimdik atalǵan oqıǵanyn mán-jaıyn túsindirdi.
Sonymen qatar, «Eco Almaty» JShS-niń basshysy Janna Asanova, ol jerde «Shomylýǵa tyıym salynady!» degen eskertý taqtashasy ornatylǵanyn atap ótti.
Almaty ákimi oqys oqıǵaǵa qatysty polıtsııa tergeý júrgizip jatqanyn habarlady.
