Almatydaǵy sý aıdyndary dron kómegimen baqylanýda

ALMATY. QazAqparat – Almatyda sýǵa túsýge tyıym salynǵan oryndar dron kómegimen baqylanýǵa alyndy, dep habarlaıdy QazAqparat tilshisi Tótenshe jaǵdaılar departamentiniń baspasóz qyzmetine silteme jasap.

Qurylǵynyń ereksheligi - ol áýe arqyly baqylap qana qoımaı, sonymen qatar Saıran kóliniń ruqsat etilmegen jerlerinde shomylyp júrgenderdi daýys zoraıtqysh júıesi arqyly eskertedi.

«Buǵan deıin Saıran kólinde patrýldeýdi 109 qutqarý qyzmetiniń qutqarýshylary eki marshrýt boıynsha qaıyqpen júrgizetin. Onyń jıiligi ár 20 mınýt saıyn, 40 mınýttyq ýaqytpen júzege asyryldy. Bul ádis aıtarlyqtaı ýaqyt alatyn. Endi sýǵa túsýge tyıym salynǵan jerlerdi dron kómegimen baqylaýǵa aldyq», - dep jazdy áleýmettik jelide qalalyq TJD baspasóz qyzmeti.

Sýǵa shomylý maýsymy bastalǵaly beri Tótenshe jaǵdaılar departamenti, polıtsııa basqarmasy, respýblıkalyq jedel- qutqarý jasaǵy men 109 qutqarý qyzmeti, QR UQ 5571 áskerı bólimi jáne eriktiler 300-den astam birlesken reıd ótkizdi. Shara barysynda 4,5 myńnan astam adamǵa únparaq taratyldy. Sonymen qatar, Qazaqstan Respýblıkasy Ákimshilik kodeksiniń 440-baby («alkogoldik ishimdikterdi ishý nemese mas kúıinde qoǵamdyq oryndarda kóriný») boıynsha 19 adam 270 myń teńgege ákimshilik jaýapqa tartyldy.

Aıta keteıik, jyl basynan beri Saıran kólinde eki adam sýǵa batyp, alty adam qutqaryldy.