Almatydaǵy statsıonarlarda jansaqtaý tósekteri tapshy - DSM
«KVI boıynsha epıdemıologııalyq jaǵdaı tek Qazaqstanda ǵana emes, búkil álem boıynsha kúrdeli. Kóptegen elde ınfektsııanyń taralýynyń ekinshi tolqyny júrip jatyr. Elimizde kún saıyn koronavırýs ınfektsııasyn juqtyrǵan azamattardyń sany ósip barady. Tirkelgen jaǵdaılardyń ortasha ósimi bir aıdyń ishinde shamamen 4,5 paıyzdy qurady. Oblystardaǵy ósim 2 paıyzdan 8 paıyzǵa deıin artýda. Búgingi kúni elimizde 44100-ge jýyq jaǵdaı tirkelip otyr. Kúnine ortasha eseppen myń jarym adam aýyrady», - dedi Ajar Gınııat OKQ-da ótken baspasóz máslıhatynda.
Onyń aıtýynsha, osy kúnge deıin aýrýhanalarda 200 naýqas kóz jumǵan.
«Sońǵy aıda COVID ınfektsııasymen aýyrǵan naýqastardyń eń joǵary ósimi – halyq kóp ornalasqan jáne iri ónerkásiptik qalalar, atap aıtqanda Nur-Sultan, Almaty, Shymkent, Atyraý, Qaraǵandy qalalarynyń halqy arasynda tirkelgen. Mysaly jeke adamdar arasynda ınfektsııanyń eń joǵary ósimi Atyraý oblysynda, Almaty qalasynda, BQO-da, Mańǵystaý, ShQO men Almaty oblystarynda baıqalady. Aýrýdyń taralýynyń ár oblysta óz ereksheligi bar. Patsıentterdiń medıtsınalyq kómek alýy kezinde olardy qıyndyqtardyń týyndaý sebepteri de ártúrli», - dedi ol.
Vıtse-mınıstrdiń aıtýynsha, máselen elordada syrqattanýyna baılanysty medıtsınalyq uıymdarǵa kóp júginedi. Al Almatyda KVI juqtyrǵandardyń negizgi úlesi – skrınıng kezinde jáne baılanysta bolǵan adamdar arasynda anyqtalýda.
«Alaıda qalada KVI boıynsha kúdikti patsıentterdi emdeýge jatqyzatyn provızorlyq aýrýhanalardyń oryny tolyq. Búgingi tańda statsıonarlarda jansaqtaý tósekteri tapshy bolyp otyr. Bul jerde pnevmonııanyń aýyr túrimen aýyratyn patsıentter em alýda. Kovıd boıynsha jaǵdaıy kúrdeli úshinshi óńir – Atyraý oblysy. Ken oryndarynda órshýler kóp. Ondaǵy ınfektsııalyq tósek oryndar da tez tolyqtyryldy. Bul jerge jumyskerler ártúrli aýdannan, basqa óńirlerden keledi», - dedi ol.
