Almatydaǵy Shyǵys aınalma joly 2011 jyly tolyq salynyp bolady
ALMATY. 15 qarasha. QazAqparat /Erbol Azanbek/- Almaty qalasy aýmaǵynyń ústińgi bóliginen ótetin Shyǵys aınalma jolyn salýǵa bólingen qarjynyń basym bóligi turǵyndardan jer telimderin satyp alýǵa jumsalýda. Bul týraly Elbasy Nursultan Nazarbaevtyń Shyǵys aınalma jolymen tanysýy barysynda aıtyldy.
Qalalyq Jolaýshylar kóligi jáne avtojoldar basqarmasynyń bastyǵy Vladımır Merenkovtyń aıtýynsha, jol qurylysyna respýblıkalyq bıýdjetten 57 mıllıard teńge bólingen. Bunyń 37 mıllıardy, ıaǵnı 60 paıyzy jer telimderin satyp alý men úılerdi súrip tastaýǵa jumsalǵan.
«Aldaǵy jyly joldyń qalǵan bóligin - 2,2 shaqyrymdy aıaqtaý úshin endi 12 mıllıard teńge kerek. Jol túsetin jerlerdi ıelerinen satyp alyp, olarǵa ótem tóleý, qurylysty jalǵastyrý úshin 8, 896 mlrd. teńge kerek. Joba boıynsha 600 úı súrilýi tıis bolatyn, qazirge deıin onyń 300-i alyndy. Jer telimderin satyp alý zań negizinde júzege asyrylýda. Alaıda jer telimin alý kóp jaǵdaıda turǵyndardyń óz erkimen emes, sot sheshimi negizinde alynyp jatyr. Ne degenmen jol 2011 jyly salynyp bitýi tıis», - dedi basqarma bastyǵy.
Esterińizge sala keteıik, atalǵan jol qurylysy 2007 jyldyń sáýir aıynda bastalǵan bolatyn. Uzyndyǵy 7,8 shaqyrymdy quraıtyn jol ál-Farabı-Dostyq dańǵylynyń qıylysynan bastalyp, kishi Almaty, Lýganskıı, Gornyı kósheleri men Jarbulaq ózeni arqyly Qulja dańǵylyna shyǵady. Qazirgi kezde ál-Farabı-Dostyq dańǵylynan Baltabaev kóshesine deıingi 5,6 shaqyrym jol ashylǵan. Qalǵan 2,2 shaqyrymdy aıaqtaý 2011 jyldyń enshisinde. Shyǵys aınalma jolynyń basty maqsaty - qalanyń ortalyq bóligindegi kólik keptelisin azaıtý, úlken megapolıstiń soltústik - shyǵys, batys -shyǵys bóligindegi tranzıtti kólik qozǵalysynyń kedergisiz júrýin qamtamasyz etý, kóliktiń qorshaǵan ortaǵa tıgizer zalalyn barynsha azaıtý.
