Almatydaǵy shaǵyn aýdan ataýy Baıbek bolyp ózgere me - ákimdik jaýaby
ALMATY. QazAqparat - Almaty ákimdigi qaladaǵy №10 A shaǵyn aýdany turǵyndarynyń usynysyna qatysty pikir bildirdi, dep habarlaıdy QazAqparat tilshisi.
Jaqynda shaǵyn aýdan turǵyndary aýdan ataýyn Nursultan Nazarbaev nemese Baýyrjan Baıbek aýdany etip ózgertýge usynys bildirgen bolatyn.
Turǵyndardyń aıtýynsha, jedel járdem men jedel qyzmet ókilderi №10 A shaǵyn aýdanyn №10 shaǵyn aýdanmen jıi shatastyratyn kórinedi.
QazAqparattyń arnaıy saýalyna berilgen jaýapta shaǵyn aýdanǵa Nursultan Nazarbaevtyń aty berilmeıtini aıtylǵan.
«Almaty qalasy ákimdiginiń № 4/493 qaýlysyna jáne Almaty qalasy máslıhatynyń sheshimine sáıkes Fýrmanov kóshesiniń ataýy Nursultan Nazarbaev dańǵyly bolyp ózgertildi.
«QR Til týraly» Zańynyń 25-5-babyna sáıkes bir ákimshilik-aýmaqtyq birliktiń shegindegi eldi mekenderge, onyń quramdas bólikterine bir ataýdy bir márte ǵana berý qarastyrylǵan», - dedi qalalyq Tilderdi damytý basqarmasynyń onomastıka bóliminiń basshysy Qalybaı Ótepbergen.
Onyń aıtýynsha, turǵyndardyń shaǵyn aýdandy Baýyrjan Baıbek dep ataý týraly usynysy kelesi aptada komıssııa qaraýyna usynylmaq.
«Qazir qalada jańadan qosylǵan eldi mekenderdegi quramdas bólikterine túgendeý jumystary júrgizilýde. Birinshi kezekte ataýy qaıtalanatyn jáne ataýy joq ákimshilik-aýmaqtyq birlikterge, eldi mekenderdiń quramdas bólikterine, ıaǵnı kóshelerge ataý berý jumystary qarastyrylýda. Atalǵan jumystardan keıin ıdeologııalyq turǵyda eskirgen ataýlardy aýystyrý josparlanǵan. Bul jumystar Qazaqstan Respýblıkasynyń qoldanystaǵy zańnama talaptaryna sáıkes belgilengen tártip boıynsha júzege asyrylady. Belgili bir ataýdyń qabyldanýy úshin 3 komıssııa otyrysynan, 2 sessııadan ótedi. Sosyn Ádilet departamentinde tirkeledi», - dedi Qalybaı Ótepbergen.
