Almatydaǵy Seıfýllın kóshesinde tártip ornady
ALMATY. QazAqparat - Almatydaǵy Seıfýllın dańǵylynda táýlik boıy reıd sharalary ótkiziledi. Kóshe boıynda jeńil júristi qyzdardy polıtsııa anyqtap, tıisti sharalar qoldanýda, dep habarlaıdy QazAqparat tilshisi.
«Almaty qalasy ákiminiń tapsyrmasy boıynsha Seıfýllın dańǵylynda ıntımdik qyzmet kórsetetin jeke tulǵalardy jáne jezóksheler ordasyn anyqtaý boıynsha reıdtik sharalar turaqty túrde júrgizilýde. Osy kezeńde ishki ister organdaryna 1 200 -den astam jeńil júristi qyz-kelinshekter jetkizildi. Sonymen qatar, joǵaryda atalǵan áıelderdi tasymaldaýmen aınalysatyn 205 adam jáne 87 taksı júrgizýshisi anyqtaldy. Polıtsııaǵa jetkizilgen árbir adamǵa qatysty arnaıy tekserý júrgiziledi: olardyń jeke basyn anyqtaımyz, basqa qylmystarǵa qatysy bar-joǵyn tekseremiz, saýsaq izin alamyz. Sodan keıin ákimshilik jáne qylmystyq zańnamaǵa sáıkes shara qoldanamyz», - dedi Almaty qalalyq PD Túrksib aýdandyq polıtsııa basqarmasynyń bastyǵy Erkin Amantaev.
Sondaı-aq, profılaktıkalyq sharaǵa SPID ortalyǵynyń qyzmetkerleri de jumyldyryldy. Medıtsına qyzmetkerleriniń jumys isteýine polıtsııa jaǵdaı jasady. Olar basqarmada arnaıy zerthana kabınetin uıymdastyrdy. Onda jeńil júristi qyzdar jynystyq jolmen beriletin aýrýlarǵa test tapsyrdy.
Almaty polıtsııasynyń jumysyna Seıfýllın kóshesiniń turǵyndary oń baǵa berdi.
«Polıtsııa qyzmetkerleri táýlik boıy jumys isteıdi. Qazir bári jaqsaryp keledi. Burynǵydaı jol boıynda turatyn qyzdar joq. Bir aı boldy, kóshe tym-tyrys. Tóbeles, aıqaı-shýdan qutyldyq», - deıdi Seıfýllın dańǵyly boıynda ornalasqan azyq-túlik dúkeniniń ıesi Gúlsim Baımahambetova.
«Men Seıfýllın kóshesinde ornalasqan kópqabatty úıde 1961 jyldan beri turamyn. Osydan 20 jyl buryn bizdiń kóshe Almatynyń eń qorqynyshty kóshesi bolatyn. Túngi kórinisin aıtýǵa aýzym barmaıdy. Jartylaı jalańash qyzdar trotýarda otyrdy, ótý múmkin bolmady. Qazir bári ózgerdi. Jeńil júristi qyzdardy nemese maskúnemderdi kórsek boldy, dereý polıtsııaǵa habarlasamyz, olar kelip shara qoldanady. Tártip kúsheıe tústi, ýchaskelik polıtsııa qyzmetkerleri jaqsy jumys istep jatyr», - deıdi jergilikti turǵyn Elızavetta Gýnbına.
