Almatydaǵy sel qaýpi: Qaladaǵy evakýatsııalaý pýnktteri belgilendi
ALMATY. QazAqparat - Almatyda sel júrý qaýpine baılanysty Naýryzbaı aýdanynda evakýatsııalaý pýnktteri belgilendi, dep habarlaıdy Qazaqparat tilshisi.
«Evakýatsııalaý pýnktteri: 1. Eski ákimshilik (Jandosov-Rysqulov). 2. Shahmerdenov atyndaǵy 175 mektep. 3. 158 mektep. (Jandosov – ıAsaýı qıylysy)», - delingen Almaty ákimdigi taratqan habarlamada.
TJD sońǵy ýaqyttarda muzdyq kólderi sýynyń aǵyzylýy týraly aqparat berdi.
Sel qaýpi týyndaǵan kóldiń sýy 77 myń tekshe metrden 26 myń tekshe metrge deıin azaıtyldy.
«2015 jyly bul plotınadan 30 myń tekshe metr sý ótken. Bógettiń jobalyq qýaty 1,2 mln tekshe metr. Bul jerge 600 myń tekshe metr sý jetedi. Apattyq jaǵdaıda sekýndyna 10 tekshe metr sý jiberiledi. Ózenniń arnasy 20 myń tekshe metrge eseptelip, betondalǵan», - dedi TJD ókilderi.
Búgin Almatyda Naýryzbaı aýdanynda az mólsherde sel júrdi.
Eske sala ketsek, tańerteń tótenshelikter Qarǵaly ózeni boıynda sel júrý qaýpi tóngenin habarlap, dabyl kótergen bolatyn.
